കോഴിക്കോട: പുറമേരിയില്‍ വെള്ളൂര്‍ റോഡിലുള്ള കോവിഡ് രോഗിയുടെ മത്സ്യവില്‍പ്പനകേന്ദ്രം തല്ലിത്തകര്‍ത്തു. ഇന്നലെ അര്‍ധരാത്രിയോടെ കടയുടെ ഷട്ടറും മത്സ്യം വില്‍ക്കുന്ന സ്റ്റാന്റും തകര്‍ത്ത നിലയിലാണ്. സംഭവവുമായി ബന്ധപ്പെട്ട് നാദാപുരം പോലീസ് കേസെടുത്തിട്ടുണ്ട്. മത്സ്യ വ്യാപാരിക്ക് രോഗം സ്ഥിരീകരിച്ചതോടെ നാദാപുരം, പുറമേരി, കുന്നുമ്മല്‍, കുറ്റ്യാടി പഞ്ചായത്തുകളും വടകരയിലെ ചില പ്രദേശങ്ങളും കണ്ടൈന്‍മെന്റ് സോണില്‍ പെട്ടിരുന്നു. സമീപ പ്രദേശങ്ങളിലെയെടക്കം മത്സ്യ മാര്‍ക്കറ്റുകളെല്ലാം അടക്കുകയും വ്യാപാരികളോട് നിരീക്ഷണത്തില്‍ പോവാന്‍ ആവശ്യപ്പെടുകയും ചെയ്തിരുന്നു.

കൊല്ലം കുരീപ്പുഴയില്‍ യുവാവ് മദ്യ ലഹരിയില്‍ സുഹൃത്തിനെ അടിച്ചു കൊന്നു. കുരീപ്പുഴ സ്വദേശി ജോസ് മാര്‍സലിനാണു (34) മരിച്ചത്. പ്രതി പ്രശാന്ത് അഞ്ചാലുംമൂട് പൊലീസ് സ്റ്റേഷനില്‍ കസ്റ്റഡിയിലെടുത്തു. ഇന്നലെ രാത്രി മദ്യപിക്കുന്നതിനിടെ ഇരുവരും തമ്മില്‍ തര്‍ക്കമുണ്ടായിരുന്നു. വീട്ടിലെത്തി ആഹാരം കഴിക്കുകയായിരുന്ന ജോസിനെ പ്രശാന്ത് വീട്ടില്‍ നിന്നു വിളിച്ചിറക്കി അടിക്കുകയായിരുന്നു.

കോഴിക്കോട് : രണ്ടുദിവസത്തെ ഇടവേളയ്ക്കുശേഷം സംസ്ഥാനത്ത് റേഷൻവിതരണം പുനഃരാരംഭിച്ചു. ജൂൺമാസത്തെ റേഷൻ വിതരണത്തോത് ക്രമീകരിക്കുന്നതുമായി ബന്ധപ്പെട്ട് രണ്ടുദിവസം റേഷൻകടകൾക്ക് അവധി നൽകിയിരുന്നു. ബുധനാഴ്ചയോടെ വിതരണം ആരംഭിച്ചു. കോവിഡിന്റെ പശ്ചാത്തലത്തിൽ കേന്ദ്രസർക്കാരിന്റെ അരി, പയർ എന്നിവയുടെ വിതരണം നടക്കുന്നതിനാൽ സോഫ്‌റ്റ്‌വേറിൽ ചില മാറ്റങ്ങൾ വരുത്തേണ്ടതിനാലാണ് രണ്ടുദിവസം റേഷൻവിതരണം നിർത്തിവെച്ചതെന്ന് സിവിൽ സപ്ലൈസ് അധികൃതർ അറിയിച്ചു. കോവിഡ് പ്രതിരോധത്തിന്റെ ഭാഗമായി ഇ-പോസ് മെഷീനിലെ ബയോമെട്രിക്ക് സംവിധാനം വഴി റേഷൻവിതരണം നടക്കില്ല.പകരം ഒ.ടി.പി. സംവിധാനത്തിലൂടെയോ, മാന്വൽ രീതിയിലോ ആയിരിക്കും വിതരണം.