ദുരിത ബാധിത മേഖലകള്‍ സന്ദര്‍ശിക്കാന്‍ രാഹുല്‍ ഗാന്ധി ഇന്ന് വയനാട്ടിലെത്തും. രാഹുല്‍ ഗാന്ധി എത്തുന്നതിന്റെ ഭാഗമായി വലിയ സുരക്ഷയാണ് ജില്ലയില്‍ പോലീസ് ഒരുക്കിയിരിക്കുന്നത്. വി.വി.ഐ.പി ആയതിനാല്‍, പഴുതടച്ച് സുരക്ഷയൊരുക്കാന്‍ പൊലീസ് എല്ലാ വഴികളും പ്രയോഗിക്കുകയാണെന്നാണ് റിപ്പോര്‍ട്ട്.
പര്യടനത്തിന് മുന്നോടിയായി രാഹുല്‍ ജില്ലയിലെ എല്ലാ സ്ഥലങ്ങളിലേക്കും എത്തുന്നുണ്ടെന്നാണ് പൊലീസ് ലഭിച്ച വിവരം. അതിനാല്‍, വയനാട്ടിലെ പൊലീസുകാര്‍ക്കും ഉദ്യോഗസ്ഥര്‍ക്കും പുറമെ, കാസര്‍കോട്, കണ്ണൂര്‍, കോഴിക്കോട് ജില്ലകളില്‍നിന്നും പ്രത്യേക യൂണിറ്റുകളില്‍നിന്നും പൊലീസിനെ വയനാട്ടിലേക്ക് വിന്യസിപ്പിച്ചിട്ടുണ്ട്.
ഇന്ന് ഉച്ചയ്ക്ക് 12.30-ന് കണ്ണൂരില്‍ ആണ് അദ്ദേഹം വിമാനമിറങ്ങുന്നത്. തുടര്‍ന്ന് റോഡ്മാര്‍ഗം മാനന്തവാടിയിലേക്കുപോകും. രാഹുല്‍ ഗാന്ധി എത്തുന്നതുമായി ബന്ധപ്പെട്ട് കണ്ണൂര്‍ വിമാനത്താവളത്തിലും പരിസരത്തും സുരക്ഷ ശക്തമാക്കിയിരിക്കുകയാണ്.
