അറബിക്കടലില് പടിഞ്ഞാറന് കാറ്റ് ശക്തി പ്രാപിക്കുന്നതിനാല് അടുത്ത അഞ്ച് ദിവസം സംസ്ഥാനത്ത് ശക്തമായ മഴക്ക് സാധ്യതയുണ്ടെന്ന് കാലാവസ്ഥ വകുപ്പ് അറിയിച്ചു. ഈ സാഹചര്യത്തില് 13 ജില്ലകളില് കാലാവസ്ഥാ വിഭാഗം മഴ മുന്നറിയിപ്പ് നല്കി. കൊല്ലം മുതല് കോഴിക്കോട് വരെയുള്ള ജില്ലകളിലും കണ്ണൂരിലുമാണ് ഓറഞ്ച് അലര്ട്ട്. വയനാട്, തിരുവനന്തപുരം ജില്ലകളില് യെല്ലോ അലര്ട്ടാണ്. കാസകോട് മഴ മുന്നറിയിപ്പില്ല. മഴ മുന്നറിയിപ്പിന്റെ പശ്ചാത്തലത്തില് മലയോരമേഖലകളിലേക്കുള്ള അത്യാവശ്യമല്ലാത്ത യാത്രകള് ഒഴിവാക്കണമെന്ന് നിര്ദേശമുണ്ട്.
മഴ തുടരുന്ന സാഹചര്യത്തില് അരുവിക്കര ഡാമിന്റെ രണ്ടും മൂന്നും ഷട്ടറുകള് നിലവില് 20 സെന്റീമീറ്റര് വീതം ഉയര്ത്തിയിട്ടുണ്ട്. ഇന്ന് മൂന്നാമത്തെയും നാലാമത്തെ ഷട്ടര് കൂടി ഉയര്ത്തത്തുന്നതിനാല് സമീപ വാസികള് ജാഗ്രത തുടരണമെന്ന് ജില്ലാ കളക്ടര് അറിയിച്ചു.
നാളെയും മറ്റന്നാളും മഴ കൂടുതല് ശക്തമാകും. അറബികടലില് പടിഞ്ഞാറന് കാറ്റ് ശക്തി പ്രാപിക്കുന്നതിനാലാണ് കേരളത്തില് മഴ കനക്കുന്നതിന് കാരണം. കേരളാ തീരത്ത് മത്സ്യ ബന്ധനത്തിന് വിലക്കേര്പ്പെടുത്തി. മഴ കനത്ത പശ്ചാത്തലത്തില് സംസ്ഥാനത്ത് 24 മണിക്കൂറും പ്രവര്ത്തിക്കുന്ന കണ്ട്രോള് റൂ തുറന്നു. ടോള് ഫ്രീ നമ്പറായ 1077 ല് ജനങ്ങള്ക്ക് 24 മണിക്കൂറും സഹായത്തിനായി ബന്ധപ്പെടാം.
അടിയന്തര സാഹചര്യം നേരിടാന് ജെ.സി.ബി, ബോട്ടുകള് മറ്റു ജീവന്രക്ഷാ ഉപകരണങ്ങള് എന്നിവ തയ്യാറാക്കിവെക്കാന് പോലീസ് സ്റ്റേഷനുകള്ക്ക് സംസ്ഥാന പോലീസ് മേധാവി അനില് കാന്ത് നിര്ദേശം നല്കിയിട്ടുണ്ട്. സുരക്ഷാബോട്ടുകള് ഉള്പ്പെടെയുള്ള സംവിധാനങ്ങള് ഒരുക്കാന് തീരദേശ പോലീസ് സ്റ്റേഷനുകളോട് ആവശ്യപ്പെട്ടിട്ടുണ്ട്.
