രാജസ്ഥാനില് മിഗ് 21 വിമാനം തകര്ന്നു വീണ് രണ്ട് പ്രദേശവാസികള് മരിച്ചു. ഹനുമാന്ഗഢിലെ ജനവാസ മേഖലയിലാണ് അപകടമുണ്ടായത്. അപകടത്തില് പൈലറ്റിനെ പരുക്കുകളോടെ ആശുപത്രിയില് പ്രവേശിപ്പിച്ചു. എന്ജിന് തകരാറാണ് അപകടകാരണമെന്നാണ് പ്രാഥമിക നിഗമനം.
സൂറത്ത്ഗഡില് നിന്നാണ് വിമാനം പറന്നുയര്ന്നത്. ഹനുമാന്ഗഢിലെ ബഹ്ലോല്നഗറിലെ വീടിനു മുകളിലാണ് വിമാനം തകര്ന്നുവീണത്. പ്രദേശവാസികളായ രണ്ട് പേരാണ് മരിച്ചതെന്നാണ് വിവരം. രക്ഷാപ്രവര്ത്തനം പുരോഗമിക്കുകയാണെന്ന് എസ്പി സുധീര് ചൗധരി പറഞ്ഞു. രക്ഷാപ്രവര്ത്തനത്തിനായി സൈന്യത്തിന്റെ ഹെലികോപ്റ്റര് സ്ഥലത്തെത്തിയിട്ടുണ്ട്.
ജനുവരിയില് രാജസ്ഥാനിലെ ഭരത്പൂരില് പരിശീലനത്തിനിടെ ഐഎഎഫിന്റെ സുഖോയില് എസ്യു 30, മിറാഷ് 2000 എന്നീ രണ്ട് യുദ്ധവിമാനങ്ങള് തകര്ന്ന് ഒരു പൈലറ്റ് കൊല്ലപ്പെട്ടിരുന്നു. ഒരു വിമാനം മധ്യപ്രദേശിലെ മൊറേനയിലും മറ്റൊന്ന് രാജസ്ഥാനിലെ ഭരത്പൂരിലുമാണ് തകര്ന്നുവീണത്.
