കോഴിക്കോട്: കോഴിക്കോട് ജില്ലയില് കോണ്ഗ്രസ് ആഹ്വാനം ചെയ്ത ഹര്ത്താലിനിടെ നഗരത്തില് സംഘര്ഷം. കോഴിക്കോട് -പാലക്കാട്ട് റൂട്ടിലോടുന്ന ബസുകളാണ് മൊഫ്യൂസല് സ്റ്റാന്ഡിന് സമീപം ഹര്ത്താല് അനുകൂലികള് തടഞ്ഞത്. ദീര്ഘദൂര കെ.എസ്.ആര്.ടി.സി ബസുകള് സര്വിസ് നടത്തുന്നുണ്ടെങ്കിലും മറ്റുജില്ലകളിലേക്കുള്ള സ്വകാര്യ ബസ്സുകളാണ് തടയുന്നത്. നിറയെ യാത്രക്കാരുള്ള ബസ്സുകളെയടക്കം സമരക്കാര് തടഞ്ഞ് തിരിച്ചയക്കാന് ശ്രമിക്കുന്നുണ്ട്. നഗരത്തില് ഗതാഗതം തടസ്സപ്പെടുത്തിയ പ്രവര്ത്തകരെ പൊലീസ് എത്തി പിടിച്ചുമാറ്റി. ഇത് സംഘര്ഷാവസ്ഥ സൃഷ്ടിക്കുന്നുണ്ട്.
മുക്കത്ത് കോണ്ഗ്രസ് പ്രവര്ത്തകര് ബസുകള് തടയുകയും കടകള് അടപ്പിക്കുകയും ചെയ്തു.
കോഴിക്കോട് ചേവായൂര് സര്വിസ് സഹകരണ ബാങ്ക് തെരഞ്ഞെടുപ്പിനിടെയുണ്ടായ സി.പി.എം അക്രമത്തില് പ്രതിഷേധിച്ചാണ് കോണ്ഗ്രസ് ഞായറാഴ്ച ജില്ലയില് ഹര്ത്താലിന് ആഹ്വാനം ചെയ്തത്. രാവിലെ ആറ് മുതല് വൈകീട്ട് ആറുവരെയാണ് ഹര്ത്താല്.
പാല്, പത്രം, ആംബുലന്സ്, ആശുപത്രി, വിവാഹ സംഘം, മറ്റ് അവശ്യ സര്വിസ് എന്നിവയെ ഒഴിവാക്കിയതായി ഹര്ത്താല് അനുകൂലികള് പറയുന്നു. ഹര്ത്താലുമായി സഹകരിക്കില്ലെന്നും കടകള് തുറക്കുമെന്നും വ്യാപാരി വ്യവസായി ഏകോപന സമിതി ജില്ല കമ്മിറ്റി അറിയിച്ചെങ്കിലും സംഘര്ഷാവസ്ഥ ഉടലെടുത്തതോടെ കടകളടച്ചുതുടങ്ങി.
