ജമ്മു കശ്മീരിന്റെ പ്രത്യേക പദവി റദ്ദാക്കിയ ഉത്തരവ് ചോദ്യം ചെയ്തു സമര്‍പ്പിച്ച ഹര്‍ജികള്ളില്‍ പിഴവുണ്ടെന്ന് സുപ്രീം കോടതി. ഇത് ചൂണ്ടിക്കാട്ടി പരാതി പരിഗണിക്കുന്നത് സുപ്രീംകോടതി മാറ്റിവെച്ചു. വലിയ വിമര്‍ശനമാണ് ഹര്‍ജിക്കെതിരെ സുപ്രീം കോടതി ഉന്നയിച്ചത്. നാലു ഹര്‍ജികളിലും പിഴവുണ്ടെന്ന് സുപ്രീം കോടതി പറഞ്ഞു. രജിസ്ട്രി ചൂണ്ടിക്കാണിച്ചിട്ടും ഹര്‍ജികളിലെ പിഴവുകള്‍ തിരുത്തിയില്ലെന്നും ഇത് എന്തുതരം ഹര്‍ജിയാണെന്നും ചീഫ് ജസ്റ്റിസ് ചോദിച്ചു.
അഭിഭാഷകനായ എം.എല്‍. ശര്‍മ്മ സമര്‍പ്പിച്ച ഹര്‍ജികളിലാണ് നിരവധി പിഴവുകള്‍ ഉണ്ടെന്ന് ചീഫ് ജസ്റ്റിസ് അധ്യക്ഷനായ ബെഞ്ച് കണ്ടെത്തിയത്. അരമണിക്കൂറോളം പരിശോധിച്ചിട്ടും ഇത് എന്തുതരം ഹര്‍ജിയാണെന്ന് മനസിലാകുന്നില്ലെന്നും തത്കാലം പിഴ ഈടാക്കുന്നില്ലെന്നും ചീഫ് ജസ്റ്റിസ് രഞ്ജന്‍ ഗൊഗോയി പറഞ്ഞു.
അതേസമയം അടുത്ത കുറച്ച് ദിവസങ്ങളില്‍ കശ്മീരിലെ നിയന്ത്രണങ്ങള്‍ നീക്കുമെന്ന് കേന്ദ്ര സര്‍ക്കാര്‍ സുപ്രീംകോടതിയെ അറിയിച്ചു. 10 ദിവസത്തിലേറെയായി തുടരുന്ന മാധ്യമങ്ങള്‍ക്കുള്ള നിയന്ത്രണങ്ങള്‍ അടിയന്തരമായി നീക്കണമെന്ന് ആവശ്യപ്പെട്ട ഹര്‍ജിക്ക് മറുപടിയായി സര്‍ക്കാര്‍ സുപ്രീംകോടതിയെ അറിയിച്ചതാണിത്.
