പിഎം ശ്രീ പദ്ധതിയെ മുൻപ് കടുത്ത ഭാഷയിൽ എതിർത്തവർ ഇപ്പോൾ വാശിയോടെ പദ്ധതി നടപ്പാക്കാൻ ശ്രമിക്കുകയാണെന്ന് വി.എൻ. വാസവൻ. പ്രതിപക്ഷത്തിരുന്നപ്പോൾ പറഞ്ഞ നിലപാടുകളെല്ലാം യുഡിഎഫ് പൂർണ്ണമായും മറന്നുവെന്നും ഇതോടെ മുസ്ലിം ലീഗിന്റെ രാഷ്ട്രീയമാണ് തകർന്നതെന്നും അദ്ദേഹം കുറ്റപ്പെടുത്തി. അണികളെ പിടിച്ചുനിർത്താൻ ലീഗ് ഉയർത്തിപ്പിടിച്ച വാദങ്ങളെല്ലാം പൊളിഞ്ഞതോടെ ലീഗ് നേതൃത്വത്തിന് സ്വന്തം അണികൾക്ക് മുൻപിൽ മറുപടിയില്ലാത്ത അവസ്ഥയാണെന്നും അദ്ദേഹം പറഞ്ഞു.
പിഎം ശ്രീ പദ്ധതി അറബിക്കടലിൽ എറിയുമെന്ന് പ്രഖ്യാപിച്ച കെ.എം. ഷാജി അടക്കമുള്ളവർ ഇപ്പോൾ പദ്ധതിക്ക് പരവതാനി വിരിക്കുകയാണെന്ന് വാസവൻ പരിഹസിച്ചു. പിഎം ശ്രീ നടപ്പിലാക്കാൻ ഉപസമിതിയെ നിയോഗിച്ചത് തന്നെ പദ്ധതി എങ്ങനെ കൊണ്ടുവരാമെന്ന് തീരുമാനിക്കാനാണ്.
ഇടതുപക്ഷത്തെക്കുറിച്ച് ഉന്നയിച്ച ആക്ഷേപം അസ്ഥാനത്താണെന്ന് പാർലമെൻറിൽ ലഭിച്ച മറുപടി വ്യക്തമാക്കുന്നുണ്ടെന്നും അദ്ദേഹം ചൂണ്ടിക്കാട്ടി.
