കൊച്ചി: തന്റെ കൈവശമുള്ള ആനക്കൊമ്പിന്റെ വിവരങ്ങള് വനം വകുപ്പിന് കൈമാറാന് മോഹന്ലാല്. വനംവകുപ്പ് പ്രഖ്യാപിച്ച ഒറ്റത്തവണ പൊതുമാപ്പ് സംവിധാനത്തിന്റെ അടിസ്ഥാനത്തിലാണ് നീക്കം. മലയാറ്റൂര് ഡിഎഫ്ഒയ്ക്ക് മോഹന്ലാല് നല്കിയ അപേക്ഷയില് നടപടികള് ആരംഭിച്ചു. രണ്ട് ജോഡി ആനക്കൊമ്പുകളും 13 കരകൗശല വസ്തുക്കളുമാണ് നടന്റെ കൈവശമുള്ളത്.
നേരത്തെ മോഹന്ലാല് ആനക്കൊമ്പ് കൈവശം വെച്ച നടപടി നിയമവിധേയമാക്കിയ സര്ക്കാര് ഉത്തരവ് ഹൈക്കോടതി റദ്ദാക്കിയിരുന്നു. പുതിയ വിജ്ഞാപനം പുറപ്പെടുവിക്കാന് സര്ക്കാറിന് ഹൈക്കോടതി നിര്ദേശം നല്കുകയും ചെയ്തിരുന്നു.
2011 ആഗസ്റ്റില് എറണാകുളം തേവരയിലെ മോഹന്ലാലിന്റെ വീട്ടില് റെയ്ഡിനെത്തിയ ആദായ നികുതി വകുപ്പ് സംഘമാണ് വീട്ടില് നിന്ന് ആനക്കൊമ്പുകള് കണ്ടെത്തിയത്. ഇവ പിടിച്ചെടുക്കുന്ന സമയത്ത് മോഹന്ലാലിന് ഇത് കൈവശം വെക്കാനുള്ള ലൈസന്സ് ഉണ്ടായിരുന്നില്ല. പിന്നീട് സര്ക്കാര് മോഹന്ലാലിന്റെ അപേക്ഷ പരിഗണിച്ച് കൈവശ സര്ട്ടിഫിക്കറ്റ് നല്കുകയും ചെയ്തു.
