കോഴിക്കോട്: ചികിത്സയ്ക്കെത്തിയ പ്രായപൂര്ത്തിയാകാത്ത പെണ്കുട്ടിയോട് ലൈംഗിക അതിക്രമം നടത്തിയെന്ന പരാതിയില് ഡോക്ടര് അറസ്റ്റിലായി. കോഴിക്കോട്ടെ മുതിര്ന്ന ശിശുരോഗവിദഗ്ധന് ചേവരമ്പലം ഗോള്ഫ്ലിങ്ക് റോഡ് മേഘമല്ഹാറില് ഡോ. സിഎം അബൂബക്കര് (78) നെയാണ് കസബ പോലീസ് പോക്സോ നിയമപ്രകാരം അറസ്റ്റ് ചെയ്തത്. കോഴിക്കോട് അഞ്ചാം മജിസ്ട്രേറ്റ് കോടതിയില് ഹാജരാക്കി റിമാന്ഡ് ചെയ്ത പ്രതിയെ ആരോഗ്യപ്രശ്നങ്ങളെ തുടര്ന്ന് ഗവ. മെഡിക്കല് കോളേജ് ആശുപത്രിയില് പ്രവേശിപ്പിച്ചു.
നഗരത്തിലെ ചാലപ്പുറത്തുള്ള ഡോക്ട്ടേഴ്സ് ക്ലിനിക്കില് വച്ച് ഏപ്രില് 11, 17 തീയതികളായിരുന്നു കേസിനാസ്പദമായ സംഭവം. പതിനഞ്ചുകാരിയായ കുട്ടി ചികിത്സയ്ക്കു വന്നപ്പോള് ലൈംഗിക അതിക്രമം നടത്തിയെന്നാണ് പരാതി. ഡോക്ടറുടെ പെരുമാറ്റത്തില് മാനസികമായി തകര്ന്ന പെണ്കുട്ടി വീട്ടുകാരോട് കാര്യങ്ങള് പറയുകയായിരുന്നു. തുടര്ന്ന് രക്ഷിതാക്കള് പോലീസില് പരാതി നല്കി.
ഇതുപ്രകാരം അന്വേഷണം നടത്തിയ പോലീസ് തിങ്കളാഴ്ച രാത്രിയോടെ ക്ലിനിക്കിലെത്തി ഡോക്ടറെ അറസ്റ്റുചെയ്യുകയായിരുന്നു. തുടര്ന്ന് കോടതിയില് ഹാജരാക്കിയപ്പോള് നെഞ്ചുവേദന അനുഭവപ്പെടുന്നതായി അറിയിച്ചതോടെയാണ് പ്രതിയെ ജുഡീഷല് കസ്റ്റഡിയില് മെഡിക്കല് കോളേജ് ആശുപത്രിയില് പ്രവേശിപ്പിച്ചത്. മുമ്പും ഇതേ ഡോക്ടര്ക്കെതിരേ സമാന പരാതിയുണ്ടായിരുന്നു. അന്ന് ഡോക്ടറുടെ ക്ലിനിക്കിലേക്ക് മാര്ച്ച് ഉള്പ്പെടെയുള്ള പ്രതിഷേധങ്ങളും നടന്നിരുന്നു.
