പത്തനംതിട്ട: ലോറി ഇരുനില കെട്ടിടത്തിലേക്ക് ഇടിച്ചു കയറി. കെട്ടിടത്തിന് കേടുപാടുകൾ. ആളുകൾ അത്ഭുതകരമായി രക്ഷപെട്ടു. ദേശീയപാതാ നിർമാണത്തിന് മണ്ണും കയറ്റി വന്ന ലോറി നിയന്ത്രണം വിട്ട് ബഹുനില കെട്ടിടത്തിലേക്ക് പാഞ്ഞു കയറുകയായിരുന്നു. ഇടിയുടെ ആഘാതത്തതിൽ കെട്ടിടം ഭാഗികമായി തകർന്നു. ഈ സമയം കെട്ടിടത്തിന്റെ താഴത്തെ നിലയിൽ പ്രവർത്തിക്കുന്ന വർക്ക് ഷോപ്പിലുണ്ടായിരുന്ന രണ്ട് പേർ അത്ഭുതകരമായാണ് രക്ഷപെട്ടത്. വർക് ഷോപ്പിൽ അറ്റകുറ്റപ്പണികൾക്കായി നിർത്തിയിട്ടിരുന്ന ബൈക്കുകൾ തകർന്നു. കെട്ടിടത്തിന് ബലക്ഷയം ഉണ്ടായിട്ടുണ്ട്.
പന്തളം കെഎസ്ആർടിസി ബസ് സ്റ്റാൻഡിന് സമീപം തോന്നല്ലൂർ കാവിൽ കൃഷ്ണപിള്ളയുടെ ഉടമസ്ഥതത്തിലുള്ള ബഹു നില കെട്ടിടത്തിലേക്കാണ് ലോറി ഇടിച്ചു കയറിയത്. രാവിലെ 7. 30 ഓടുകൂടിയായിരുന്നു അപകടം. നാഷണൽ ഹൈവേ നിർമാണത്തിനുള്ള മണ്ണുമായി പോവുകയായിരുന്ന ലോറി റോഡിന് ഇടതുവശത്തേക്കുള്ള കെട്ടിടത്തിലേക്ക് നിയന്ത്രണം വിട്ട് ഇടിച്ചു കയറുകയായിരുന്നു.
ഇവിടെ പ്രവർത്തിച്ചിരുന്ന രശ്മി ടൂ വീലർ വർക്ക് ഷോപ്പ് ഉടമ മങ്ങാരം കുന്നിക്കുഴി കിഴക്കേതിൽ രമേശനും വാഹനം നന്നാക്കാനായി എത്തിയ പടനിലം സ്വദേശി വിനോദും വർക്ക് ഷോപ്പിൽ ഉണ്ടായിരുന്നു. തൊട്ടടുത്ത മുറിയിൽ ലോറി ഇടിച്ചു കയറിയതോടെ ഇവർ പുറത്തേക്ക് ഓടി രക്ഷപ്പെടുകയായിരുന്നു. ഇടിയുടെ ആഘാതത്തിൽ കെട്ടിടത്തിന്റെ ഭിത്തി തകർന്ന് മേൽക്കൂര ഉൾപ്പെടെ നിരങ്ങി മാറിയിട്ടുണ്ട്.
കെട്ടിടത്തിന്റെ എല്ലാ വശത്തും ഭിത്തിയിൽ ഉടനീളം വിള്ളലും രൂപപ്പെട്ടു. കെട്ടിടം ഉപയോഗ ശൂന്യമായതായി ഉടമ പറയുന്നു. സമീപത്ത് തട്ടുകട ഉണ്ടായിരുന്നെങ്കിലും രാവിലെ തുറന്നു പ്രവർത്തിക്കാതിരുന്നതും തിരക്കില്ലാതിരുന്നതും വൻ ദുരന്തം ഒഴിവാക്കി. അപകടത്തിൽ സമീപത്തുണ്ടായിരുന്ന ഏതാനും വാഹനങ്ങൾക്കും കേടു പാടുകൾ സംഭവിച്ചിട്ടുണ്ട്.
