കൊച്ചി: തൃപ്പൂണിത്തുറ ഇരുമ്പനത്ത് പോലീസ് കസ്റ്റഡി മരണത്തിൽ അന്വേഷണം തുടരുകയാണെന്ന് സിറ്റി പോലീസ് കമ്മീഷണർ കെ സേതുരാമൻ. ഹിൽ പാലസ് സ്റ്റേഷനിലെ സിസിടിവി ദൃശ്യങ്ങൾ പോലീസ് പരിശോധിച്ചു. മരിച്ച മനോഹരനെ എസ് ഐ അടിച്ചതായി തെളിഞ്ഞത് കൊണ്ടാണ് സസ്പെൻഡ് ചെയ്തത്. അതേസമയം ഒപ്പമുണ്ടായിരുന്ന പോലീസുകാർ മർദ്ദിച്ചതായി തെളിവില്ല എന്നും കമ്മീഷണർ പറഞ്ഞു.
കസ്റ്റഡി മരണ കേസിൽ സാക്ഷികളുടെ മൊഴികളില്ലെന്നും സിറ്റി പോലീസ് കമ്മീഷണർ വ്യക്തമാക്കി. അതേസമയം കസ്റ്റഡിയിൽ മരിച്ച മനോഹരന്‍റെ ബന്ധുക്കളുടെ മൊഴി ക്രൈംബ്രാഞ്ച് കഴിഞ്ഞദിവസം രേഖപ്പെടുത്തിയിരുന്നു. അന്വേഷണ സംഘം മനോഹരന്‍റെ വീട്ടിലെത്തിയാണ് മൊഴി രേഖപ്പെടുത്തിയത്.
മനോഹരന് മറ്റ് അസുഖങ്ങളൊന്നും ഉണ്ടായിരുന്നില്ലെന്ന് കുടുംബം മൊഴി നൽകി. കസ്റ്റഡിയിലെടുത്ത് മർദ്ദിച്ചതാണ് മരണകാരണമെന്നും ബന്ധുക്കൾ ആരോപിച്ചു. വരുംദിവസങ്ങളിൽ ആരോപണവിധേയരായ പോലീസുകാരെ ക്രൈംബ്രാഞ്ച് ചോദ്യം ചെയ്യും. സംഭവത്തിന് പിന്നാലെ എസ് ഐ ജിമ്മി ജോസിനെയാണ് പോലീസ് സസ്പെൻഡ് ചെയ്തിരുന്നത്.
വാഹന പരിശോധനക്കിടെ പോലീസ് കൈ കാണിച്ചപ്പോൾ അൽപം മുന്നോട്ടു നീങ്ങിയാണ് മനോഹരൻ വാഹനം നിർത്തിയത്. പോലീസുകാരൻ ഓടിയെത്തി മനോഹരന്‍റെ മുഖത്തടിച്ചെന്നാണ് ക്സാക്ഷികൾ പറയുന്നത്. പോലീസ് ജീപ്പിൽവച്ചും മനോഹരനെ മർദിച്ചെന്നും ആരോപണമുണ്ട്. സ്റ്റേഷനിലാണ് മനോഹരൻ കുഴഞ്ഞു വീഴുന്നത്. ഉടനെ താലൂക്ക് ആശുപത്രിയിലും പിന്നീട് കൊച്ചിയിലെ സ്വകാര്യ ആശുപത്രിയിലും എത്തിച്ചെങ്കിലും മരിച്ചിരുന്നു.
