കൊല്ലം: ഓയൂരിലെ ആറ് വയസ്സുകാരി അബിഗേല് സാറാ റെജിയെ കണ്ടെത്തിയത് ആശ്വാസമായെങ്കിലും സംഭവത്തിലെ പ്രതികളെ കണ്ടെത്താനാവാകാതെ കുഴങ്ങുകയാണ് അന്വേഷണ സംഘം . പ്രതികളെപ്പറ്റി ചില അഭ്യൂഹങ്ങള് ഉള്ളതല്ലാതെ പിടികൂടാന് പോലീസിന് കഴിഞ്ഞിട്ടില്ല. പട്ടാപ്പകല് കുട്ടിയെ തട്ടിയെടുത്ത ക്രിമിനല്സംഘം പട്ടാപ്പകല് പോലീസിന്റെ മുന്നിലൂടെ നഗരമധ്യത്തില്തന്നെ കുട്ടിയെ ഉപേക്ഷിച്ചു . പഴുതടച്ച പരിശോധനകള് നടത്തിയിട്ടും പോലീസിന്റെ കണ്ണുവെട്ടിച്ച് പ്രതികളെല്ലാം കാണാമറയത്താണ്. പ്രതികള് ആരാണ്, അവരുടെ ഉദ്ദേശ്യമെന്തായിരുന്നു, പണത്തിനുവേണ്ടിയാണോ കൃത്യം ചെയ്തത് തുടങ്ങിയ ചോദ്യങ്ങള് ഇപ്പോഴും ബാക്കിയാണ്.
ഒരു സ്ത്രീയാണ് കുട്ടിയെ ആശ്രാമം മൈതാനത്ത് ഓട്ടോയില് കൊണ്ടുവന്ന് ഉപേക്ഷിച്ചതെന്ന് വ്യക്തമായിട്ടുണ്ട്. ഇവരെക്കുറിച്ച് പോലീസിനു സൂചനലഭിച്ചതായി പറയുന്നുണ്ടെങ്കിലും സ്ഥിരീകരണമില്ല. കുട്ടിയെ കിട്ടി ഒരു ദിവസം കഴിഞ്ഞിട്ടും പ്രതികളിലേക്ക് എത്താനാകാത്തതില് പ്രതിഷേധമുണ്ട്.പോലീസ് അന്വേഷണത്താലുള്ള സമ്മര്ദമാണ് കുട്ടിയെ മോചിപ്പിക്കാന് കാരണമെന്ന് എ.ഡി.ജി.പി.യും എം.എല്.എ.മാരും അവകാശപ്പെടുമ്പോള് ചൊവ്വാഴ്ച 10-ന് കുഞ്ഞിനെ മോചിപ്പിക്കാമെന്ന വാക്ക് അക്രമിസംഘം പാലിച്ചതല്ലേയെന്ന മറുചോദ്യത്തിന് ഉത്തരമില്ല.കുട്ടി ഇപ്പോഴും സംഭവത്തിന്റെ ആഘാതത്തിലാണ്. മൊഴിനല്കാന് പറ്റുന്ന സ്ഥിതിയിലായിട്ടില്ല. ലഭിച്ച വിവരങ്ങള് കോര്ത്തിണക്കി പ്രതികളിലേക്ക് എത്താന് പൊലീസ് ശ്രമിച്ചുകൊണ്ടിരിക്കുകയാണെന്നാണ് അന്വേഷണ സംഘത്തിന്റെ വിശദീകരണം