സംസ്ഥാനത്ത് ഇന്ന് സമ്പൂര്ണ അടച്ചിടല്. അവശ്യസാധനങ്ങള് വില്ക്കുന്ന കടകള് മാത്രം തുറക്കാനാണ് അനുമതി. കോവിഡ് നിയന്ത്രണങ്ങള് കൂടുതല് കടുപ്പിക്കുന്നതിന്റെ ഭാഗമായി നാളെ മുതല് രാത്രി കര്ഫ്യൂവും നിലവില് വരും.കോവിഡ് നിയന്ത്രണങ്ങള് ഏങ്ങനെ തുടരണമെന്ന് ചര്ച്ച ചെയ്യാന് ബുധനാഴ്ച വിദഗ്ധരുടെ യോഗം വിളിച്ചിട്ടുണ്ട്. കോവിഡ് പ്രതിരോധ പ്രവര്ത്തനങ്ങള് ഏകോപിപ്പിക്കുന്നതിന് ഐഎഎസ് ഉദ്യോഗസ്ഥര്ക്ക് പുറമേ മുതിര്ന്ന ഐപിഎസ് ഉദ്യോഗസ്ഥരെ ജില്ലകളിലേക്ക് നിയമിച്ചു.
സംസ്ഥാനത്ത് നാളെ മുതല് രാത്രികാല കര്ഫ്യൂ ഉണ്ടാകും. രാത്രി പത്തുമുതല് രാവിലെ ആറുവരെയാണ് കര്ഫ്യൂ. ഓണത്തിന് ശേഷം കോവിഡ് കേസുകള് കൂടിയതോടെയാണ് നിയന്ത്രണങ്ങള് കടുപ്പിക്കുന്നത്. വാര്ഡുകളിലെ ട്രപ്പിള് ലോക്ഡൗണ് ശക്തമാക്കും. പ്രതിവാര രോഗവ്യാപനതോത് ഏഴ് ശതമാനമുള്ള സ്ഥലങ്ങളിലാണ് ലോക്ഡൗണ് ക!ര്ശനമാക്കുക. ഇപ്പോള് അത് എട്ടാണ്.
ചരക്ക് വാഹനങ്ങളെയും അത്യാവശ്യ സേവനങ്ങളില് ഏര്പ്പെടുന്ന ജീവനക്കാരെയും കര്ഫ്യൂവില് നിന്ന് ഒഴിവാക്കി. ട്രെയിന്, വിമാന യാത്രികര്ക്ക് ടിക്കറ്റ് കയ്യില് കരുതിയാല് യാത്രചെയ്യാം. മറ്റെന്തെങ്കിലും അത്യാവശ്യത്തിനായി യാത്ര ചെയ്യണമെങ്കില് അടുത്തുള്ള പൊലീസ് സ്റ്റേഷനില് നിന്ന് അനുമതി വാങ്ങണം.
