കൊച്ചി: ടിനി ടോമിനെതിരായ നടി അന്സിബയുടെ പരാതിയില് കേസെടുക്കാനാവില്ലെന്ന് പൊലീസ് റിപ്പോര്ട്ട്. കടവന്ത്ര സി ഐ എറണാകുളം എസ് പിക്ക് സമര്പ്പിച്ച റിപ്പോര്ട്ടിലാണ് ടിനി ടോമിനെതിരെ കേസെടുക്കാന് കഴിയില്ലെന്ന് പരാമര്ശിക്കുന്നത്. മറ്റൊരാള് പറഞ്ഞ് കേട്ടതിന്റെ അടിസ്ഥാനത്തില് കേസെടുക്കാന് ആവില്ലെന്നാണ് പൊലീസ് റിപ്പോര്ട്ടില് പറയുന്നത്. പരാതിയില് അന്സിബയുടെ ഹര്ജി കോടതി ഇന്ന് പരിഗണിക്കാനിരിക്കെയാണ് പൊലീസ് റിപ്പോര്ട്ട് പുറത്ത് വരുന്നത്.
ജൂണ് ഒന്നിനാണ് അന്സിബ ടിനിക്കെതിരെ പൊലീസില് പരാതി നല്കിയത്. ടിനി ടോം തനിക്കെതിരെ തുടര്ച്ചയായി അപവാദ പ്രചാരണം നടത്തിയെന്നായിരുന്നു നടിയുടെ പരാതി. ടിനി ടോമിന്റെ ഡ്രൈവറെ താന് മതം മാറ്റാന് ശ്രമിച്ചു എന്നതുള്പ്പെടെ വ്യാജ പ്രചാരണങ്ങള് നടത്തിയെന്നും തന്നെയും കുടുംബത്തെയും വേട്ടയാടാന് ശ്രമിച്ചുവെന്നും അന്സിബ ആരോപിച്ചിരുന്നു. താന് കടുത്ത മാനസിക പീഡനത്തിന് ഇരയായെന്നും ടിനി ടോമിന്റേത് സ്ത്രീത്വത്തെ അപമാനിക്കുന്ന പെരുമാറ്റമാണെന്നും അന്സിബ പരാതിയില് ആരോപിച്ചിരുന്നു. മാധ്യമങ്ങളിലൂടെയുള്ള വെളിപ്പെടുത്തലിന് പിന്നാലെയായിരുന്നു പൊലീസില് പരാതി നല്കിയത്.
