സംസ്ഥാനത്ത് അതിശക്തമായ മഴ തുടരുന്നതിനിടെ ബാണാസുര സാഗര് ഡാമിന്റെ ഷട്ടര് തുറന്നു. വിവിധ നദികളില് ജലനിരപ്പ് ഉയര്ന്നതോടെ പ്രളയ സാധ്യത മുന്നറിയിപ്പും നല്കിയിട്ടുണ്ട്. സെക്കന്റില് 50 ക്യുബിക് വെള്ളം ഘട്ടം ഘട്ടമായി പുഴയിലേക്ക് ഒഴുക്കി വിടും. പുഴയുടെ തീരങ്ങളിലുള്ളവരും താഴ്ന്ന പ്രദേശങ്ങളില് താമസിക്കുന്നവരും ജാഗ്രത പാലിക്കണമെന്ന് ജില്ലാ ദുരന്ത നിവാരണ അതോറിറ്റി ചെയര്പേഴ്സണ് കൂടിയായ ജില്ലാ കളക്ടര് ഡി. ആര് മേഘശ്രീ അറിയിച്ചു. അടിയന്തര സാഹചര്യങ്ങളില് ആളുകള്ക്ക് എമര്ജന്സി ഓപ്പറേറ്റിങ് സെന്ററിലെ 1077 നമ്പറില് വിളിക്കാം.
അതോടൊപ്പം ബാണാസുര ഡാമിന്റെ ഷട്ടര് ഉയര്ത്തുന്നതിനാല് ആരും ജലാശയങ്ങളില് ഇറങ്ങരുതെന്ന് ജില്ലാ പോലീസ് മേധാവി തപോഷ് ബസുമതാരി ഐ പി എസ് അറിയിച്ചു. ജലനിരപ്പ് ഉയരാന് സാധ്യത ഉള്ളതിനാല് ആരും കുളിക്കുന്നതിനോ വസ്ത്രമലക്കുന്നതിനോ മീന് പിടിക്കുന്നതിനോ മറ്റോ ജലാശയങ്ങളില് ഇറങ്ങരുത്. അനധികൃതമായി വിനോദത്തിനോ മീന് പിടിക്കുന്നതിനോ ജലാശയങ്ങളിലേക്ക് ഇറങ്ങുന്നവര്ക്കെതിരെ കര്ശന നടപടികള് സ്വീകരിക്കും. കരമാന് തോട്, പനമരം പുഴ തീരങ്ങളിലും കബനി പുഴകള്, കൈവഴികള്ക്കടുത്ത പ്രദേശങ്ങളിലും താഴ്ന്ന പ്രദേശങ്ങളിലും താമസിക്കുന്നവര് കൂടുതല് ജാഗ്രത പാലിക്കണം. ജില്ലയിലെ വിദ്യഭ്യാസ സ്ഥാപനങ്ങള്ക്ക് അവധി പ്രഖ്യാപിച്ചതിനാല് കുട്ടികളെ കൂടുതല് ശ്രദ്ധിക്കാന് രക്ഷിതാക്കള് ശ്രദ്ധിക്കേണ്ടതാണ്. അടിയന്തിര സാഹചര്യത്തില് ജില്ലാ എമര്ജന്സി ഓപ്പറേറ്റിംഗ് സെന്ററില് വിളിക്കാം, നമ്പര് 1077. പോലീസ് സഹായത്തിനായി 112 ലേക്ക് വിളിക്കുക.
