നീറ്റ് യു.ജി 2026 പരീക്ഷ റദ്ദാക്കിയ സാഹചര്യത്തിൽ വിദ്യാർത്ഥികളുടെയും രക്ഷിതാക്കളുടെയും ആശങ്ക പരിഹരിക്കാൻ അടിയന്തര ഇടപെടൽ വേണമെന്ന് ആവശ്യപ്പെട്ട് കേരള നിയമസഭാ സ്പീക്കർ എ എൻ ഷംസീർ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന് കത്തയച്ചു.
മേയ് 3ന് നടന്ന നീറ്റ് യു.ജി പരീക്ഷ ക്രമക്കേടുകൾ ആരോപിച്ച് റദ്ദാക്കിയ സാഹചര്യത്തിൽ പുനഃപരീക്ഷയുടെ തീയതി ഇതുവരെ പ്രഖ്യാപിക്കാത്തത് വിദ്യാർത്ഥികളിലും രക്ഷിതാക്കളിലും വലിയ മാനസിക സമ്മർദ്ദവും അനിശ്ചിതത്വവും സൃഷ്ടിച്ചിട്ടുണ്ടെന്ന് സ്പീക്കർ കത്തിൽ ചൂണ്ടിക്കാട്ടി.
ലക്ഷക്കണക്കിന് വിദ്യാർത്ഥികളുടെ ഭാവിയെ ബാധിക്കുന്ന വിഷയമായതിനാൽ നീറ്റ് യു.ജി പരീക്ഷയുടെ പുനഃസംഘാടനം വേഗത്തിലും സുഗമമായും നടത്താൻ കേന്ദ്ര സർക്കാർ അടിയന്തര നടപടികൾ സ്വീകരിക്കണമെന്ന് സ്പീക്കർ ആവശ്യപ്പെട്ടു.
