കണ്ണൂർ : ടി പി ചന്ദ്രശേഖരൻ വധക്കേസിൽ ജയില്‍ശിക്ഷ അനുഭവിച്ചുവന്ന സിപിഐ എം പാനൂര്‍ ഏരിയാ കമ്മിറ്റി അംഗം പാറാട് കണ്ണങ്കോട്ടെ പടിഞ്ഞാറെ കുഞ്ഞിക്കാട്ടില്‍ പി കെ കുഞ്ഞനന്തന്‍ (72) അന്തരിച്ചു. തിരുവനന്തപുരം മെഡിക്കല്‍ കോളേജ് ആശുപത്രിയില്‍ വ്യാഴാഴ്ച രാത്രി 9. 25ന് ആയിരുന്നു അന്ത്യം. വയറ്റിലുണ്ടായ അണുബാധയെതുടര്‍ന്ന് ഒരു വര്‍ഷത്തിലേറെയായി ഇദ്ദേഹം ചികിത്സയിലായിരുന്നു.
ടി പി ചന്ദ്രശേഖരന്‍ കേസില്‍ 2014 ജനുവരിയിലാണ് വിചാരണക്കോടതി ജീവപര്യന്തം തടവിന് ശിക്ഷിച്ചത്. വിധിക്കെതിരായ അപ്പീല്‍ ഹൈക്കോടതിയുടെ പരിഗണനയിലാണ്. 1970ല്‍ സിപിഐ എം അംഗമായി. 15 വര്‍ഷം കുന്നോത്തുപറമ്പ് ലോക്കല്‍ സെക്രട്ടറിയായിരുന്നു. കര്‍ഷകത്തൊഴിലാളി യൂണിയന്‍ കണ്ണൂര്‍ ജില്ലാ കമ്മിറ്റി അംഗമായും പ്രവര്‍ത്തിച്ചു. 1980 മുതല്‍ സിപിഐ എം പാനൂര്‍ ഏരിയാ കമ്മിറ്റി അംഗമാണ്.
