ഫാറൂഖ് സ്റ്റേഷനിലെ സീനിയര് സിവില് പൊലീസ് ഓഫീസര് യു ഉമേഷിനെ ( ഉമേഷ് വള്ളക്കുന്ന്) സേനയില് നിന്ന് പിരിച്ചു വിടാന് തീരുമാനം. നിര്ബന്ധിത വിരമിക്കല് ഉത്തരവില് ഐജി എവി ജോര്ജ് വിരമിക്കുന്നതിന് മുമ്പ് ഒപ്പ് വെച്ചു.പൊലീസ് സേനയ്ക്കെതിരെ സമൂഹ മാധ്യമങ്ങളിലൂടെ നിരന്തരം വിമര്ശനം ഉന്നയിക്കുന്ന സാഹചര്യത്തിലാണ് തീരുമാനമെന്നാണ് വിവരം.
അച്ചടക്ക ലംഘനം അംഗീകരിക്കാനാവില്ലെന്ന് എവി ജോര്ജ് വ്യക്തമാക്കി. പൊലീസ് സേനയ്ക്കെതിരെ സമൂഹ മാധ്യമങ്ങളിലൂടെ ഉമേഷ് വള്ളിക്കുന്ന് നിരന്തരം വിമര്ശനം ഉന്നയിച്ചിരുന്നു.
കഴിഞ്ഞ ദിവസം വനിതാ ദിന പരിപാടിയില് പങ്കെടുത്തതിന് കാരണം കാണിക്കല് നോട്ടീസ് ലഭിച്ചതില് സിറ്റി പൊലീസ് കമ്മീഷണറെ വിമര്ശിച്ച് ഉമേഷ് ഫേസ്ബുക്ക് പോസ്റ്റ് ഇട്ടിരുന്നു. നേരത്തെയും പൊലീസ് സംവിധാനത്തിനുള്ളിലെ വീഴ്ചകളെ പറ്റി ഉമേഷ് വള്ളിക്കുന്ന് സമൂഹ മാധ്യമങ്ങളിലൂടെ രംഗത്തെത്തിയിരുന്നു. ശബരിമല വിഷയവുമായി ബന്ധപ്പെട്ട് ബിജെപി നടത്തിയ ഹര്ത്താലില് മുന് സിറ്റി പൊലീസ് കമ്മീഷണറും ജില്ലാ പൊലീസ് മേധാവിയുമായിരുന്ന എസ് കാളിരാജ് മഹേഷ് കുമാരിനെതിരെ ഫേസ്ബുക്ക് പോസ്റ്റിട്ടതിന് 2019 ല് ഉമേഷ് വള്ളിക്കുന്നിന് സസ്പെന്ഷനും ലഭിച്ചിരുന്നു.
