എസ്എഫ്ഐ പ്രവര്ത്തകര് രാഹുല്ഗാന്ധിയുടെ ഓഫീസ് ആക്രമിച്ച സംഭവത്തില് പ്രതിഷേധം ശക്തമാകുന്നതിനിടെ, മാര്ച്ചിനെ ന്യായീകരിച്ച് എസ്എഫ്ഐ വയനാട് ജില്ലാ വൈസ് പ്രസിഡന്റ് കെ ആര് അവിഷിത്ത്. ബഫര്സോണ് വിഷയത്തില് എസ്എഫ്ഐ എന്തിന് ഇടപെടണം എന്നു ചോദിക്കുന്നവരോട്, ഈ നാട്ടിലെ ജനങ്ങളെ ബാധിക്കുന്ന എല്ലാ വിഷയവും വിദ്യാര്ത്ഥികള് എന്ന നിലയില് SFI യുടെ കൂടെ വിഷയമാണ് എന്ന് അവിഷിത്ത് ഫെയ്സ്ബുക്ക് കുറിപ്പില് പറയുന്നു.
ഈ സംഭവത്തിന്റെ പേരില് എസ്എഫ്ഐയെ വേട്ടയാടി ചോരകുടിക്കാം എന്ന് കരുതിയിട്ടുണ്ടെങ്കില്, കേരളത്തിലെ പൊലീസ് കോണ്ഗ്രസ് പ്രവര്ത്തകരുടെ പണിയാണ് എടുക്കാന് ഉദ്ദേശിക്കുന്നതെങ്കില് പ്രതിരോധം തീര്ക്കേണ്ടി വരുമെന്ന് അവിഷിത്ത് ഫെയ്സ്ബുക്ക് കുറിപ്പില് പ്രതികരിച്ചു.
അവിഷിത്തിന്റെ കുറിപ്പിന്റെ പൂര്ണരൂപം-
‘എസ്എഫ്ഐ എന്തിന് ബഫര്സോണ് വിഷയത്തില് ഇടപെടണം എസ്എഫ്ഐ ക്ക് അതില് ഇടപെടാന് എന്ത് ആവിശ്യമാണുള്ളത് എന്ന് ചോദിക്കുന്നവരോട് ഈ നാട്ടിലെ ജനങ്ങളെ ബാധിക്കുന്ന എല്ലാ വിഷയവും വിദ്യാര്ത്ഥികള് എന്ന നിലയില് എസ്എഫ്ഐ യുടെ കൂടെ വിഷയമാണ്…
സമരത്തില് ഉണ്ടായിട്ടുള്ള അനിഷ്ടസംഭവങ്ങള് അത് ആ സംഘടനയുടെ നേതൃത്വം പരിശോധിക്കട്ടെ, നിയമപരമായി നീങ്ങട്ടെ..
ഇപ്പോള് വയനാട് എംപി വീണ്ടും 3 ദിവസത്തെ സന്ദര്ശനത്തിന് വരുന്നുണ്ട് പോലും വീണ്ടും ഞങ്ങള് ആവര്ത്തിക്കുകയാണ് വയനാട് എംപി ക്ക് സന്ദര്ശനത്തിന് വരാന് ഉള്ള സ്ഥലമല്ല അയാളുടെ പാര്ലമെന്റ് മണ്ഡലം..
ഈ സംഭവത്തിന്റെ പേരില് എസ്എഫ്ഐയെ വേട്ടയാടി ചോരകുടിക്കാം എന്ന് കരുതിയിട്ടുണ്ടെങ്കില് കേരളത്തിലെ പോലീസ് കോണ്ഗ്രസ് പ്രവര്ത്തകരുടെ പണിയാണ് എടുക്കാന് ഉദ്ദേശിക്കുന്നതെങ്കില് ഞങ്ങള്ക്ക് പ്രതിരോധം തീര്ക്കേണ്ടി വരും..’