കേരളം മാത്രമല്ല ഇന്ത്യ പോലും ഇതുവരെ ഇത്രയും മോശം ഭരണം കണ്ടിട്ടില്ലെന്ന് സുരേഷ്ഗോപി എം.പി. ജനങ്ങളോട് സ്മരണയില്ലാത്ത ഇടത് സര്ക്കാരിനെ കാലുവാരിയെടുത്ത് അറബിക്കടലില് എറിയണമെന്നും അദ്ദേഹം പറഞ്ഞു. കണ്ണൂര് തളാപ്പില് എന്.ഡി.എയുടെ തെരഞ്ഞെടുപ്പ് പരിപാടിയില് സംസാരിക്കവെയായിരുന്നു സുരേഷ്ഗോപിയുടെ പരാമര്ശം.
സംസ്ഥാനത്ത് സര്ക്കാര് നടത്തുന്ന കൊള്ളക്കിടയില് കൊലപാതകത്തിന് ചെറിയ ശമനം വന്നതില് ദൈവത്തോട് നന്ദി പറയാം. കോസ്മിക്ക് ലോ ഇവരെ ഒടുക്കിയിരിക്കും. പാവങ്ങളാണ് കേരളത്തിലെ പ്രതിപക്ഷം. ശക്തമായ പ്രതിപക്ഷമായിരുന്നെങ്കില് ഇവരെ എടുത്ത് കളയുമായിരുന്നെന്ന് സുരേഷ് ഗോപി പറഞ്ഞു.
2016 തെഞ്ഞെടുപ്പില് ബി.ജെ.പിക്ക് പത്ത് പേരെ തന്നിരുന്നെങ്കില് സര്ക്കാരിനെ ശക്തമായി നേരിടാമായിരുന്നു. ഈ പ്രത്യയശാസ്ത്രം ഇനി അവശേഷിക്കാന് പാടില്ല. കഴിഞ്ഞ നാലേമുക്കാല് വര്ഷം ഈ സര്ക്കാര് ചെയ്തുകൂട്ടിയത് ഇഴ കീറി പരിശോധിക്കണമെന്നും സുരേഷ് ഗോപി പറഞ്ഞു.
