പത്തനംതിട്ട: ആറന്മുളയിൽ കോവിഡ് രോഗിയെ ആംബുലൻസ് ഡ്രൈവർ പീഡിപ്പിച്ച സംഭവത്തിൽ പ്രതികരണവുമായി ബിജെപി സംസ്ഥാന അധ്യക്ഷൻ കെ സുരേന്ദ്രൻ. അർധരാത്രിയിൽ നഴ്സുമാരില്ലാതെ യുവതികളെ ആംബുലൻസിൽ കൊണ്ടു പോയത് ആരോഗ്യ വകുപ്പിന്റെ അനാസ്ഥയാണെന്നും ആരോഗ്യ മന്ത്രി രാജി വയ്ക്കണമെന്നും ബിജെപി സംസ്ഥാന അധ്യക്ഷൻ പറഞ്ഞു.
സംഭവം കേരളത്തിന് നാണക്കേടുണ്ടാക്കുന്നതാണെന്ന് സുരേന്ദ്രന് പറഞ്ഞു. 108 ആംബുലൻസ് ഡ്രൈവർമാരുടെ നിയമനം പാർട്ടി ഓഫീസ് വഴിയാണെന്നും സുരേന്ദ്രൻ ആരോപിച്ചു.
അതേസമയം സംഭവത്തിൽ അറസ്റ്റിലായ ഡ്രൈവർ നൗഫൽ കൊലക്കേസ് കേസ് പ്രതിയെന്ന് വിവരം. 2018 ൽ ഇയാൾക്കെതിരെ 308 പ്രകാരം കേസ് എടുത്തിരുന്നു. സംഭവത്തിന് പിന്നാലെ നൗഫലിനെ ജോലിയിൽ നിന്ന് പിരിച്ചുവിടാൻ ആരോഗ്യമന്ത്രി കെ കെ ശൈലജ നിർദേശിച്ചു. പ്രതിയുടെ അറസ്റ്റ് രേഖപ്പെടുത്തിയിട്ടുണ്ട്.
