കൊവിഡ് പ്രതിരോധ പ്രവര്ത്തനങ്ങളില് ധാരാവി മാതൃകയാണെന്ന് ലോകാരോഗ്യ സംഘടന. കൊവിഡിനെ നിയന്ത്രണ വിധേയമാക്കാന് ധാരാവിക്ക് കഴിഞ്ഞു. രോഗ വ്യാപനം തടയാനും രോഗം പടരാതിരിക്കാനും പരിശോധനകളിലൂടെയും സാമൂഹിക അകലം പാലിക്കുന്നതിലൂടെയും സാധിക്കുമെന്ന് ധാരാവി തെളിയിച്ചെന്നും ലോകാരോഗ്യ സംഘടന വിലയിരുത്തി.
ഏഷ്യയിലെ ഏറ്റവും വലിയ ചേരിയായ ധാരാവിയില് വെള്ളിയാഴ്ച 12 പേര്ക്ക് മാത്രമാണ് കൊവിഡ് സ്ഥിരീകരിച്ചത്. അതും മഹാരാഷ്ടയില് കോവിഡ് രോഗികള് വലിയ തോതില് വര്ധിക്കുമ്പോഴാണ്. ധാരാവിയില് 2,359 കേസുകളാണ് ഇതുവരെ റിപ്പോര്ട്ട് ചെയ്തിട്ടുള്ളത്. ഇതില്ത്തന്നെ 166 പേരാണ് നിലവില് ചികിത്സയിലുള്ളത്. 1,952 പേര് രോഗമുക്തരായി ആശുപത്രി വിട്ടെന്നാണ് റിപ്പോര്ട്ട്.
ഇന്ത്യയിലെ ഏറ്റവും വലിയ ചേരിയായ ധാരാവി, ഇറ്റലി, സ്പെയിന്, ദക്ഷിണ കൊറിയ എന്നിവ ക്രിയാത്മകമായ പ്രതിരോധ പ്രവര്ത്തനങ്ങളിലൂടെ കൊവിഡിനെ നേരിടാം എന്ന കാര്യം തെളിയിച്ചെന്നാണ് ലോകാരോഗ്യ സംഘടന വെള്ളിയാഴ്ച അറിയിച്ചത്.
മഹാരാഷ്ടയില് കോവിഡ് വ്യാപിച്ചതോടുകൂടി ഏറ്റവും ആശങ്കപ്പെട്ട കാര്യമായിരുന്നു ധാരാവിയിലേത്. ജനങ്ങള് തിങ്ങി താമസിക്കുന്നതിനാല് കോവിഡ് വ്യാപനത്തിന് ഏറെ അനുകൂല സാഹചര്യമായിരുന്നു. ഏപ്രില് ഒന്നിനാണ് ധാരാവിയില് ആദ്യമായി കൊവിഡ് സ്ഥിരീകരിച്ചത്. ജനസാന്ദ്രതയേറിയ ചേരിയായതിനാല് ധാരാവി വൈറസിന്റെ പ്രജനന കേന്ദ്രമായി മാറിയേക്കാം എന്ന ആശങ്ക ഉയരുകയും ചെയ്തിരുന്നു. എന്നാലിപ്പോള് കൊവിഡ് മരണത്തിലും രോഗികളുടെ എണ്ണത്തിലും വലിയ കുറവാണ് ഇവിടെയെന്നാണ് റിപ്പോര്ട്ടുകള് വ്യക്തമാക്കുന്നത്.
