തിരുവനന്തപുരം: തിരിച്ചെത്തിയ പ്രവാസികൾക്കുള്ള വായ്പാ-സബ്സിഡി പദ്ധതികളിലേക്ക് കൂടുതൽ സംരംഭകരെ ആകർഷിക്കുന്നതിനായി കാലാനുസൃതമായ മാറ്റങ്ങൾ നടപ്പാക്കുമെന്ന് മുഖ്യമന്ത്രി വി.ഡി. സതീശൻ നിയമസഭയിൽ അറിയിച്ചു. നോർക റൂട്ട്സ് സമർപ്പിച്ച എൻ.ഡി.പി.ആർ.ഇ.എം പദ്ധതിയുടെ പുതിയ കരട് മാർഗരേഖ പരിശോധിച്ചുവരികയാണെന്നും കുന്ദമംഗലം എം.എൽ.എ എം.എ. റസാഖ് മാസ്റ്ററുടെ ചോദ്യത്തിന് മറുപടിയായി മുഖ്യമന്ത്രി വ്യക്തമാക്കി.
വിദേശത്ത് കുറഞ്ഞത് രണ്ട് വർഷമെങ്കിലും ജോലി ചെയ്ത് തിരിച്ചെത്തിയ പ്രവാസികളുടെ സാമ്പത്തിക പുനരധിവാസത്തിനായി നോർക റൂട്ട്സ് മുഖേനയാണ് എൻ.ഡി.പി.ആർ.ഇ.എം പദ്ധതി നടപ്പാക്കുന്നത്. പദ്ധതിയിലൂടെ സ്വയംതൊഴിൽ സംരംഭങ്ങൾ ആരംഭിക്കുന്നതിന് 30 ലക്ഷം രൂപ വരെ വായ്പാ സഹായം ലഭിക്കും.
പദ്ധതി ചെലവിന്റെ 15 ശതമാനം മൂലധന സബ്സിഡിയായും അനുവദിക്കും. പരമാവധി മൂന്ന് ലക്ഷം രൂപയാണ് സബ്സിഡി. വായ്പ കൃത്യമായി തിരിച്ചടയ്ക്കുന്നവർക്ക് ആദ്യ നാല് വർഷത്തേക്ക് മൂന്ന് ശതമാനം പലിശ ഇളവും ലഭിക്കും.
നിലവിലുള്ള ആനുകൂല്യങ്ങൾ കൂടുതൽ പ്രവാസി സംരംഭകരിലേക്ക് എത്തിക്കുന്നതിനും പദ്ധതിയുടെ പ്രയോജനം വിപുലപ്പെടുത്തുന്നതിനുമുള്ള മാറ്റങ്ങളാണ് പുതിയ മാർഗരേഖയിലൂടെ ലക്ഷ്യമിടുന്നത്.
