കോഴിക്കോട്: ഫുട്ബോൾ ലോകകപ്പ് ക്വാർട്ടർ ഫൈനലിൽ അർജന്റീനയുടെ വിജയം ആഘോഷിക്കുന്നതിനിടെ പടക്കം പൊട്ടിത്തെറിച്ച് യുവാവിന്റെ കൈവിരലുകൾ അറ്റു. ചക്കുംകടവ് സ്വദേശി മുഹമ്മദ് സഹദി(22)നാണ് ഗുരുതരമായി പരിക്കേറ്റത്. സുഹൃത്തുക്കൾക്കൊപ്പമുള്ള വിജയാഘോഷത്തിനിടെയാണ് ദാരുണമായ സംഭവം.
സഹദിന്റെ ഇടതു കൈയിലെ രണ്ടു വിരലുകളാണ് അറ്റുപോയത്. ചെറുവിരലും മോതിരവിരലും പൂർണമായും നടുവിരലിന്റെ പകുതിയും നഷ്ടമായി. യുവാവിന്റെ ഇരുകൈയിലും പടക്കമുണ്ടായിരുന്നു. ആഘോഷിക്കുന്നതിനിടെ പടക്കം പൊട്ടിത്തെറിച്ച് ഇടതു കൈയിലെ വിരലുകൾ നഷ്ടമായി. വലതു കൈയിലെ പടക്കം കത്തിക്കുന്നതിനിടയിൽ അബദ്ധത്തിൽ ഇടതു കൈയിലുണ്ടായിരുന്ന പടക്കം പൊട്ടിത്തെറിക്കുകയായിരുന്നു. കോഴിക്കോട്ടെ സ്വകാര്യ ആശുപത്രിയിൽ പ്രവേശിപ്പിച്ച സഹദിനെ അടിയന്തര ശസ്ത്രക്രിയക്ക് വിധേയനാക്കി.
