തിരുവനന്തപുരം: തളിപ്പറമ്പില് പി.കെ ശ്യാമളയുടെ സ്ഥാനാര്ഥിത്വത്തില് എം.വി ഗോവിന്ദന്റെ പേര് പറയാതെ വിമര്ശനവുമായി സിപിഎം ജനറല് സെക്രട്ടറി എം.എ ബേബി. ബന്ധുക്കളെ സ്ഥാനാര്ഥിയാക്കുമ്പോള് ഔചിത്യം പാലിക്കണമായിരുന്നു. താനായിരുന്നെങ്കില് അത് പാലിക്കുമായിരുന്നു. മലപ്പുറത്ത് നടന്ന ഇഎംഎസിന്റെ ലോകം ദേശീയ സെമിനാറിന്റെ സമാപന സമ്മേളനത്തില് സംസാരിക്കുകയായിരുന്നു അദ്ദേഹം.
ഒരാള് സ്വന്തം അര്ഹത കൊണ്ട് സ്ഥാനാര്ഥിയാകുമ്പോള് അവരുടെ ബന്ധുത്വം പറഞ്ഞ് ബൂര്ഷ്വാ മാധ്യമങ്ങള് കടന്നാക്രമിക്കാറുണ്ട്. അത്തരം പ്രചാരണങ്ങളുടെ പിന്നാലെ പാര്ട്ടി പോകേണ്ടതില്ല. എന്നാല് ഒരു നേതാവുമായി ബന്ധപ്പെട്ട ഒരാളെ സ്ഥാനാര്ത്ഥിയാക്കുന്നത് പാര്ട്ടിയെ മൊത്തത്തില് കടന്നാക്രമിക്കാന് മാധ്യമങ്ങള്ക്ക് അവസരം നല്കുമെന്ന് തോന്നുകയാണെങ്കില്, അത് ഒഴിവാക്കാനുള്ള ഔചിത്യം ബന്ധപ്പെട്ട നേതാവ് തന്നെ കാണിക്കണം.
അത്തരമൊരു സാഹചര്യത്തില് താനുമായി ബന്ധപ്പെട്ട ഒരാള്ക്ക് പകരം മറ്റൊരാള് മതി എന്ന് തീരുമാനിക്കാന് നേതാവ് തന്നെ മുന്കൈയെടുക്കുന്നതാണ് ശരിയായ രീതിയെന്ന് അദ്ദേഹം ചൂണ്ടിക്കാട്ടി. കണ്ണൂരില് ഉണ്ടായ ഒരു സ്ഥാനാര്ത്ഥിത്വത്തിന്റെ കാര്യത്തില് വേണ്ടത്ര ശ്രദ്ധ ഉണ്ടായില്ല എന്ന സ്വയംവിമര്ശനം കണ്ണൂര് ജില്ലാ കമ്മിറ്റി നടത്തുകയും അത് സംസ്ഥാന കമ്മിറ്റി അംഗീകരിക്കുകയും ചെയ്തിട്ടുണ്ടെന്നും അദ്ദേഹം കൂട്ടിച്ചേര്ത്തു.
