ബംഗളൂരു: ഷിരൂരില് മണ്ണിടിച്ചിലില് കാണാതായ കോഴിക്കോട് സ്വദേശി അര്ജുനെ കണ്ടെത്താനുള്ള തിരച്ചില് പത്താം ദിവസത്തിലേക്ക്. ഇന്നലത്തെ തെരച്ചിലില് ലോറി കണ്ടെത്തിയതിനാല് ഇന്ന് നിര്ണായക ദിവസമാണ്. ലോറിയുടെ കൃത്യസ്ഥലം കണ്ടെത്തി ഡൈവര്മാര് കാബിനില് എത്തിയാകും അര്ജുനുണ്ടോ എന്ന് സ്ഥിരീകരിക്കുക. അതിനായി മുങ്ങല് വിദഗ്ധര് പരിശോധന നടത്തും. അതിനുശേഷമായിരിക്കും ട്രക്ക് പുറത്തെടുക്കുക. കുത്തൊഴുക്കുള്ള പുഴയില് ലോറി ഉറപ്പിച്ചുനിര്ത്തും തുടര്ന്ന് ലോറി ലോക്ക് ചെയ്ത ശേഷം ക്രെയിന് ഉപയോഗിച്ച് ഉയര്ത്തും. ഇതിനായി സൈന്യം വിവിധ ഉപകരണങ്ങള് രാത്രിയോടെ സ്ഥലത്തെത്തിച്ചു. നിലവില് മഴ മാറി നില്ക്കുന്നത് രക്ഷാപ്രവര്ത്തനത്തിന് ഗുണം ചെയ്യുമെന്നാണ് പ്രതീക്ഷിക്കുന്നത്. ഷിറ്റൂരില് ഓറഞ്ച് അലര്ട്ടാണ് പ്രഖ്യാപിച്ചിരിക്കുന്നത്.
തെരച്ചില് നടക്കുന്ന സ്ഥലത്തേക്ക് മാധ്യമ പ്രവര്ത്തകര്ക്ക് പ്രവേശനം ഉണ്ടാകില്ല. മൊബൈല് ഫോണ് അടക്കമുള്ളവ അനുവദിക്കില്ലെന്ന് അധികൃതര് വ്യക്തമാക്കിയിട്ടുണ്ട്. വൈകുന്നേരത്തിനുള്ളില് ഓപ്പറേഷന് പൂര്ത്തിയാക്കാനാകുമെന്നാണ് പ്രതീക്ഷ. ഇന്നലെ വൈകിട്ടോടെ ലോറി കണ്ടെത്തിയതിനു പിന്നാലെ നാവിക സേനയുടെ സംഘം സ്ഥലത്തേക്ക് തിരിച്ചെങ്കിലും കനത്ത മഴയെ തുടര്ന്ന് ഇന്നത്തെ തിരച്ചില് അവസാനിപ്പിച്ചു.
