ജബല്പൂര്: മധ്യപ്രദേശിലെ ജബല്പൂരില് കല്യാണമണ്ഡപത്തില്നിന്നും രണ്ട് യുവതികള് ലക്ഷക്കണക്കിന് രൂപ കവര്ന്നു. പണമടങ്ങിയ വലിയ ബാഗുകളുമായി യുവതികള് പുറത്ത് പോകുന്നതിന്റെ ദൃശ്യങ്ങള് പുറത്തുവന്നു. ഗൊസാല്പൂര് ഏരിയയിലെ ഹം ലോഗ് എന്ന കല്യാണ മണ്ഡപത്തിലാണ് കഴിഞ്ഞ ദിവസം വന് കവര്ച്ച നടന്നത്. ധന്പുരിയിലെ സോണി കുടുംബത്തിലെ വിവാഹം നടക്കുമ്പോഴായിരുന്നു കവര്ച്ച.
ചടങ്ങിലെ അതിഥികളെ പോലെ വിവാഹത്തില് പങ്കെടുക്കാനുള്ള വസ്ത്രങ്ങള് ധരിച്ചായിരുന്നു പെണ്കുട്ടികളും എത്തിയിരുന്നത്. അതിനാല് ഇവരെ ആരും സംശയിച്ചതുമില്ല. വിവാഹ ആഘോഷം തകൃതിയായി നടക്കവെ രണ്ടു യുവതികളും പണം ബാഗിലാക്കി മെല്ലെ പുറത്തേക്ക് പോകുകയായിരുന്നു. ദൃശ്യങ്ങളുടെ സഹായത്തോടെ പെണ്കുട്ടികളെ തിരിച്ചറിയാനുള്ള ശ്രമത്തിലാണ് പൊലീസ്.
