കൊച്ചി: സംസ്ഥാനത്ത് അതിഥിതൊഴിലാളികള് താമസിക്കുന്ന കെട്ടിടങ്ങളുടെ കാലപ്പഴക്കം സംബന്ധിച്ച് ജില്ലാ കളക്ടര്മാരോട് പരിശോധന നടത്താന് ആവശ്യപ്പെടുമെന്ന് റവന്യൂ മന്ത്രി കെ രാജന് പറഞ്ഞു. കൊടകരയില് കനത്ത മഴയില് കെട്ടിടം ഇടിഞ്ഞുവീണ് മൂന്ന് അതിഥി തൊഴിലാളികള് മരിച്ച സാഹചര്യത്തിലാണ് മന്ത്രി ഇടപെടുമെന്ന് ഉറപ്പ് നല്കിയത്. അതിഥി തൊഴിലാളികള് താമസിക്കുന്ന സ്ഥലങ്ങള് പരിശോധിച്ച് തൊഴില് വകുപ്പുമായി ചേര്ന്ന് കാര്യങ്ങള് നീക്കുമെന്നും മന്ത്രി ഉറപ്പ് നല്കി.
തൃശൂര് കൊടകരയിലാണ് പഴയ കെട്ടിടം ഇടിഞ്ഞുവീണ് മൂന്ന് അതിഥി തൊഴിലാളികള് കുടുങ്ങിയത്. രാവിലെ ആറുമണിയോടെയായിരുന്നു സംഭവം. ഇവര് ജോലിക്കുപോകാനായി ഇറങ്ങുന്നതിനിടെയാണ് കെട്ടിടം തകര്ന്നുവീണത്.
