കുന്ദമംഗലം : ചെത്ത് കടവ് ഒമ്പതാം വാർഡിലെ പേരടി നാഗത്താം കോട്ടയ്ക്കരികെ വവ്വാലുകൾ കൂട്ടത്തോടെ ചത്തു വീണ സംഭവത്തെ തുടർന്ന് നടത്തിയ സ്രവ പരിശോധന ഫലം നെഗറ്റീവ്. യാതൊരു രീതിയിലുമുള്ള രോഗവുമല്ല വവ്വാലുകൾ ചത്തു വീണതിന് കാരണമെന്നും കാലാവസ്ഥ പ്രശ്നവും ഭക്ഷണ ലഭ്യത കുറവുമാണ് ഇത്തരത്തിൽ ചത്തു വീഴാനുണ്ടായ സാഹചര്യമെന്നും അധികൃതർ അറിയിച്ചു.
പ്രദേശത്ത് വസിക്കുന്ന ആയിരകണക്കിന് വവ്വാലുകൾ കഴിഞ്ഞ നാലു ദിവസങ്ങളിലായി തൊട്ടടുത്ത വാഴ തോട്ടങ്ങളിലും തോടുകളിലും വീട്ടു പരിസരങ്ങളിലും ചത്തു വീഴുന്ന വാർത്ത കഴിഞ്ഞ ദിവസം കുന്ദമംഗലം ന്യൂസ്.കോം നൽകിയതിനെ തുടർന്നായിരുന്നു പ്രദേശത്ത് പരിശോധന നടത്തിയിരുന്നത്. തുടർന്ന് സംഭവ സ്ഥലത്തെത്തി വെറ്റിനറി ,ഹെൽത്ത് ഡിപ്പാർട്മെന്റുകൾ പരിശോധന നടത്തി. സ്രവം കണ്ണൂർ ലാബിലേക്ക് അയച്ചിരുന്നു. ഫലം അനുകൂലമായത് പ്രദേശ വാസികൾക്ക് ഏറെ ആശ്വാസം നൽകി.
