തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിനുള്ള നാമനിര്ദേശ പത്രികകളുടെ സൂക്ഷ്മ പരിശോധന നാളെ നടക്കും. അതത് തദ്ദേശ സ്വയംഭരണ സ്ഥാപനങ്ങളില് റിട്ടേണിങ് ഓഫീസര്മാരുടെയും അസി.റിട്ടേണിങ് ഓഫീസര്മാരുടെയും നേതൃത്വത്തിലാണ് സൂക്ഷ്മ പരിശോധന നടക്കുക. നാമനിര്ദ്ദേശ പത്രിക സമര്പ്പിക്കുന്നതിനുള്ള തീയതി ഇന്ന് സമാപിച്ചു. ഈ മാസം 12നാണ് പത്രിക സമര്പ്പണം ആരംഭിച്ചത്.
നാമനിര്ദ്ദേശ പത്രിക സമര്പ്പിക്കുന്ന തീയതിയില് 21 വയസ് പൂര്ത്തിയായിരിക്കണം എന്നതൊഴികെയുള്ള മറ്റു കാര്യങ്ങളില് സൂക്ഷ്മ പരിശോധന നടത്തുന്ന ദിവസത്തിലെ സ്ഥിതിയാണ് യോഗ്യതക്കും അയോഗ്യതക്കും കണക്കാക്കുക. ഏതെങ്കിലും കേസുകളില് പ്രതിയായതുകൊണ്ട് മാത്രം ഒരാള്ക്ക് തിരഞ്ഞെടുപ്പില് മത്സരിക്കുന്നതിനു അയോഗ്യതയില്ല. അഴിമതിയ്ക്കോ കൂറില്ലായ്മയ്ക്കോ ഉദ്യോഗത്തില് നിന്നും പിരിച്ചുവിടപ്പെട്ട ഏതൊരു ഉദ്യോഗസ്ഥനും പിരിച്ചുവിടപ്പെട്ട തീയതി മുതല് അഞ്ചു വര്ഷത്തേയ്ക്ക് അയോഗ്യത ഉണ്ടായിരിക്കും.
കേരള തദ്ദേശസ്വയംഭരണ സ്ഥാപനങ്ങള് (കൂറുമാറ്റ നിരോധനം) ആക്ടിലെ വ്യവസ്ഥപ്രകാരം അയോഗ്യനാക്കപ്പെടുകയും അയോഗ്യനാക്കപ്പെട്ട തീയതി മുതല് ആറു വര്ഷം കഴിയാതിരിക്കുകയുമാണെങ്കില് അയോഗ്യനാണ്. (അയോഗ്യരാക്കപ്പെട്ടവരുടെ ലിസ്റ്റ് കമ്മീഷന്റെ sec.kerala.gov.in വെബ് സൈറ്റില് പരിശോധനക്ക് ലഭ്യമാണ്.) എന്നാല് അത് സംബന്ധിച്ച് ഹൈക്കോടതിയുടെ സ്റ്റേ ഉത്തരവുണ്ട് എന്ന കാരണത്താല് മാത്രം അയോഗ്യത ഇല്ലാതാകുന്നില്ല. സ്റ്റേ ഉത്തരവിലെ ഉപാധികള് പരിശോധിച്ച് വരണാധികാരി അയോഗ്യത സംബന്ധിച്ച തീരുമാനം കൈക്കൊള്ളണം.
തദ്ദേശ സ്വയംഭരണ സ്ഥാപനത്തിലെ തിരഞ്ഞെടുപ്പില് മത്സരിച്ചതിനുശേഷം തിരഞ്ഞെടുപ്പു ചെലവുകണക്ക് യഥാസമയം സമര്പ്പിച്ചിട്ടില്ലാത്തവര്ക്ക് കമ്മീഷന് അയോഗ്യനാക്കുന്ന തീയതി മുതല് 5 വര്ഷക്കാലം അയോഗ്യതയുണ്ട്. (അയോഗ്യരാക്കപ്പെട്ടവരുടെ ലിസ്റ്റ് കമ്മീഷന്റെ വെബ് സൈറ്റില് പരിശോധനക്ക് ലഭ്യമാണ്.) ഗ്രാമസഭയുടേയൊ വാര്ഡ് സഭയുടേയൊ യോഗം വിളിച്ച് കൂട്ടുന്നതില് വീഴ്ച വരുത്തുക, അംഗമായി തുടരവേ തദ്ദേശ സ്ഥാപത്തിന്റേയോ അതിന്റെ സ്റ്റാന്റിംഗ് കമ്മിറ്റികളുടേയോ യോഗങ്ങളില് ഹാജരാകാതിരിക്കുക തുടങ്ങിയ കാരണങ്ങളാലുണ്ടായ അയോഗ്യത കമ്മിറ്റിയുടെ കാലാവധിവരെ മാത്രമേ ഉണ്ടായിരിക്കുകയുള്ളൂ. അവര്ക്ക് ഈ പൊതുതെരഞ്ഞെടുപ്പില് മത്സരിക്കുന്നതിന് അയോഗ്യതയില്ല.
സര്ക്കാരുമായുള്ള ഏതെങ്കിലും കരാറിലോ ലേലത്തിനോ വീഴ്ച വരുത്തിയതിന്റെ ഫലമായി ബ്ലാക്ക് ലിസ്റ്റില് ഉള്പ്പെടുത്തിയിട്ടുണ്ടെങ്കില് അയോഗ്യനാകും. തദ്ദേശ സ്ഥാപനത്തിന്റെ ധനമോ മറ്റു വസ്തുക്കളോ നഷ്ടപ്പെടുത്തുകയോ പാഴാക്കുകയോ ദുര്വിനിയോഗം ചെയ്യുകയോ ചെയ്തിട്ടുണ്ടെന്ന് തദ്ദേശ സ്വയംഭരണ സ്ഥാപനത്തിനുവേണ്ടിയുള്ള ഓംബുഡ്സ്മാന് കണ്ടെത്തിയിട്ടുണ്ടെങ്കിലും അയോഗ്യനാകും.
ഒരാള് ബധിരമൂകനാണെങ്കിലും അയോഗ്യനാണ്.
അഭിഭാഷകനായി പ്രാക്ടീസ് ചെയ്യുന്നതില് നിന്നും വിലക്കപ്പെട്ടിട്ടുണ്ടെങ്കില് അയോഗ്യനാണ്. സര്ക്കാര് അഭിഭാഷകര്ക്ക് പുറമെ ബന്ധപ്പെട്ട തദ്ദേശസ്വയംഭരണ സ്ഥപാനത്തിനുവേണ്ടി പ്രതിഫലം പറ്റുന്ന അഭിഭാഷകനായി ജോലിയിലേര്പ്പെട്ടിരിക്കുന്ന ആളും സ്ഥാനാര്ത്ഥിയായി മത്സരിക്കുന്നതിനു അയോഗ്യനാണ്.ഒരാള് തദ്ദേശസ്ഥാപനത്തിന്റെ ഒരു വാര്ഡിലേയ്ക്ക് മാത്രമെ മത്സരിക്കുവാന് പാടുള്ളൂ. ഒന്നില് കൂടുതല് വാര്ഡിലേയ്ക്കു മത്സരിച്ചാല് അയാളുടെ എല്ലാ നാമനിര്ദ്ദേശ പത്രികകളും നിരസിക്കും. ത്രിതല പഞ്ചായത്തുകളില് ഒന്നിലധികം തലങ്ങളില് മത്സരിക്കാവുന്നതാണ്.
നാമനിര്ദ്ദേശ പത്രികയോടൊപ്പം സമര്പ്പിക്കുന്ന 2എ ഫോമിലെ എല്ലാ കോളങ്ങളും പൂരിപ്പിച്ചിട്ടുണ്ടെന്ന് സ്ഥാനാര്ത്ഥികള് ഉറപ്പാക്കേണ്ടതാണ്. ഭേദഗതി വരുത്തിയ നാമനിര്ദ്ദേശ പത്രികയും 2എ ഫാമും കമ്മീഷന്റെ സൈറ്റില് ലഭ്യമാണ്.നാമനിര്ദ്ദേശപത്രിക സമര്പ്പിച്ചിട്ടുള്ള സ്ഥാനാര്ത്ഥി വരണാധികാരി മുമ്പാകെയോ സംസ്ഥാന തിരഞ്ഞെടുപ്പ് കമ്മീഷന് അധികാരപ്പെടുത്തിയ ഉദ്യാഗസ്ഥന് മുമ്പാകെയോ കേരള പഞ്ചായത്ത് രാജ് ആക്ടിലെ 1 -ാം പട്ടികയിലോ കേരള മുനിസിപ്പാലിറ്റി ആക്ടിലെ 2-ാം പട്ടികയിലോ നല്കിയിട്ടുള്ള ഫോമില് സത്യപ്രതിഞ്ജയോ ദൃഢപ്രതിഞ്ജയോ ചെയ്ത് ഒപ്പ് വച്ചിട്ടില്ലെങ്കില് അയാളുടെ നാമനിര്ദ്ദേശപത്രിക നിരസിക്കപ്പെടും. ഇപ്രകാരം അധികാരപ്പെടുത്തിയ ഉദ്യോഗസ്ഥരുടെ കൂട്ടത്തില് സംസ്ഥാന സര്വ്വീസിലെ എല്ലാ ഗസറ്റഡ് ഓഫീസര്മാരും ചികിത്സയിലുള്ള സ്ഥാനാര്ത്ഥിയെ സംബന്ധിച്ച് അദ്ദേഹത്തെ ചികിത്സിക്കുന്ന ഡോക്ടര്മാരും പ്രസ്തുത ആശുപത്രിയുടെ ചുമതലയുള്ള മെഡിക്കല് സൂപ്രണ്ടുമാരും ഉള്പ്പെടുന്നു.സ്ഥാനാര്ത്ഥിയുടെ യോഗ്യതയും അയോഗ്യതയും സംബന്ധിച്ച് വരണാധികാരി അര്ദ്ധ നീതിന്യായ സ്വഭാവമുള്ള ആളെന്ന നിലക്ക് സ്വന്തമായി തീരുമാനമെടുക്കണം.