ദേശീയപാത ടാറിങ് വിവാദത്തിൽ എ എം ആരിഫ് എംപിയെ തള്ളി മന്ത്രി സജി ചെറിയാന്. ദേശീയപാത നിര്മാണത്തിലെ അപാകതയിൽ വിജിലൻസ് അന്വേഷണം ആവശ്യമില്ലെന്നായിരുന്നു മന്ത്രിയുടെ പ്രതികരണം. ആരിഫിന്റെ ആവശ്യപ്രകാരം സുധാകരന്റെ കാലത്ത് വിജിലന്സ് അന്വേഷിച്ചതാണെന്ന് സജി ചെറിയാന് വ്യക്തമാക്കി. ആരിഫ് ആവശ്യപ്പെട്ട വിഷയത്തിൽ വകുപ്പുതല അന്വേഷണം നടത്തിയതാണ്. വെള്ളക്കെട്ടാണ് പ്രശ്നമെന്ന് അന്വേഷണത്തില് വ്യക്തമായതാണ്. ആരിഫിന് ഈ വിഷയത്തില് പോരായ്മ ഉണ്ടായോ എന്ന് പരിശോധിക്കുമെന്നും സജി ചെറിയാന് പറഞ്ഞു.
എന്നാൽ, ദേശീയപാത നിര്മാണത്തിലെ അപാകത പരിഹരിക്കാനാണ് പരാതി നല്കിയതെന്ന് എ എം ആരിഫ് എം പി പ്രതികരിച്ചു. ഏത് തരത്തിലുളള അന്വേഷണം വേണമെന്ന് പൊതുമരാമത്ത് മന്ത്രിക്ക് തീരുമാനിക്കാം. മന്ത്രി സജി ചെറിയാന് പറഞ്ഞതിനെ എതിര്ക്കുന്നില്ല. തന്റെ നിലപാട് പാര്ട്ടിക്ക് പരിശോധിക്കാമെന്നും ആരിഫ് പറഞ്ഞു.
പാർട്ടി ഘടകമായ ജില്ലാ കമ്മിറ്റിയിൽ പോലും ആലോചിക്കാതെയാണ് മന്ത്രി മുഹമ്മദ് റിയാസിന് എതിരെ ആരിഫ് അന്വേഷണം ആവശ്യപ്പെട്ട് കത്ത് നൽകിയത്. ജി സുധാകരൻ പൊതുമരാമത്ത് മന്ത്രിയായിരിക്കെ ആരിഫിൻ്റെ തന്നെ പരാതിയിൽ അരൂർ- ചേർത്തല പാതയിലെ അശാസ്ത്രീയത സംബന്ധിച്ച് അന്വേഷണം നടന്നിരുന്നു. അന്നത്തെ അന്വേഷണ റിപ്പോർട്ട് മാധ്യമങ്ങളിലൂടെ പുറത്ത് വരികയും ചെയ്തിരുന്നു. നേരത്തെ അന്വേഷിച്ച് അവസാനിപ്പിച്ച ആരോപണം വീണ്ടും ഉയർത്തിയതും പാർട്ടിയോട് ആലോചിക്കാത്തതും ആരിഫിന് തിരിച്ചടിയായിരിക്കുകയാണ്. ഇക്കാര്യങ്ങളിൽ പാർട്ടി നേതൃത്വത്തിന് കടുത്ത അതൃപ്തിയുണ്ട്.
