തിരുവനന്തപുരം: GST വകുപ്പിന്റെ പുതിയ വാഹനങ്ങളുടെ ഫ്ലാഗ് ഓഫ് മുഖ്യമന്ത്രി വി ഡി സതീശൻ നിർവഹിച്ചു. ഇന്ന് 64 പുതിയ ഔദ്യോഗിക വാഹനങ്ങളാണ് നിരത്തിലിറങ്ങുന്നത്. സർക്കാരിന്റെ നൂറുദിന കർമ പദ്ധതിയുടെ ഭാഗമായാണ് പുതിയ വാഹനങ്ങൾ നൽകുന്നത്. നികുതി വർദ്ധിപ്പിക്കാൻ കൂട്ടായ പ്രവർത്തനം ആവശ്യമാണ്. സാമ്പത്തിക പ്രതിസന്ധി പ്രയാസങ്ങൾ മറികടക്കാൻ മികച്ച രീതിയിൽ പ്രവർത്തിക്കാൻ കഴിയുന്ന വകുപ്പാണ് ഇത്.
വകുപ്പിനെ കൂടുതൽ കാര്യക്ഷമമാക്കുന്നതിന്റെ ഭാഗമാണ് പുതിയ വാഹനങ്ങൾ നൽകുന്നത്. സംസ്ഥാന സർക്കാർ പ്രഖ്യാപിച്ച നൂറു ദിന കർമ്മ പദ്ധതിയിൽ ഇത് ഉൾപ്പെടുത്തിയിരുന്നു. പദ്ധതി വേഗത്തിൽനടപ്പിലാക്കാൻ കഴിഞ്ഞതിൽ ഉദ്യോഗസ്ഥരെ അഭിനന്ദിക്കുന്നുവെന്നും മുഖ്യമന്ത്രി വ്യക്തമാക്കി. .വകുപ്പിലെ ഓഡിറ്റ്, ഇന്റലിജൻസ്, ടാക്സ് പേയർ സർവീസസ് വിഭാഗങ്ങളുടെ ഫീൽഡ് തല പ്രവർത്തനങ്ങളും നിരീക്ഷണങ്ങളും കൂടുതൽ ഊർജിതമാക്കുകയാണ് ലക്ഷ്യം.
പുതിയ വാഹനങ്ങൾ എത്തുന്നതോടെ ഫീൽഡ് തല പരിശോധനകൾ വേഗത്തിലാക്കാനും നികുതി ചോർച്ച ഫലപ്രദമായി തടയാനും സാധിക്കും. നികുതിദായകർക്ക് ആവശ്യമായ സേവനങ്ങൾ കാലതാമസമില്ലാതെ ലഭ്യമാക്കുന്നതിനൊപ്പം സംസ്ഥാനത്തിന്റെ റവന്യു വരുമാനം വർധിപ്പിക്കാനും ഇത് വഴിയൊരുക്കും.
