പൂനെ: ദക്ഷിണാഫ്രിക്കക്കെതിരെ ഇന്ത്യന്‍ ക്യാപ്റ്റന്‍ വിരാട് കോഹ്ലിക്ക് ഇരട്ട സെഞ്ച്വറി. കോഹ്ലിയുടെ സെഞ്ചുറി മികവില്‍ ദക്ഷിണാഫ്രിക്കക്കെതിരെ ഇന്ത്യന്‍ ടീം സ്‌കോര്‍ 500 കടന്നു. രഹാനയ്ക്കു പിന്നാലെ ക്രീസിലെത്തിയ രവീന്ദ്ര ജഡേജയും അര്‍ധസെഞ്ചുറി തികച്ച് മുന്നേറുകയാണ്. ഒടുവില്‍ വിവരം ലഭിക്കുമ്പോള്‍ ഇന്ത്യ നാല് വിക്കറ്റ് നഷ്ടത്തില്‍ 506 റണ്‍സെന്ന നിലയിലാണ്. 211 റണ്‍സുമായി കോഹ്ലിയും 57 റണ്‍സുമായി ജഡേജയുമാണ് ക്രീസില്‍. 295 പന്തില്‍ നിന്നാണ് കോഹ്ലി ഇരട്ട സെഞ്ചുറി തികച്ചത്.
മൂന്ന് വിക്കറ്റ് നഷ്ടത്തില്‍ 273 റണ്‍സെന്ന നിലയില്‍ രണ്ടാം ദിനം കളി പുനരാരംഭിച്ച ഇന്ത്യക്ക് വേണ്ടി നായകനും ഉപനായകനും ചേര്‍ന്ന് തകര്‍ത്തടിച്ചു. നാലാം വിക്കറ്റില്‍ 178 റണ്‍സിന്റെ കൂട്ടുകെട്ട് ഇരുവരും തീര്‍ത്തു. എന്നാല്‍. രഹാനെയെ കേശവ് മഹാരാജ് പുറത്താക്കിയ ശേഷം കോഹ്ലി റണ്‍സ് കുതിപ്പ് തുടര്‍ന്നു. അവസാന ഓവറുകളില്‍ ആറ് റണ്‍സിന് മുകളിലായിരുന്നു ഇന്ത്യയുടെ ശരാശരി.
