കുന്നമംഗലം ടൗണിലെയും പരിസരപ്രദേശങ്ങളിലെയും നാക്ഷണല് ഹൈവേയിലെ സീബ്രാ ലൈനുകള് മയഞ്ഞുപോയത് കാല്നടയാത്രക്കാര്ക്ക് ബുദ്ധിമുട്ടാവുന്നു. ഏറെ വാഹനങ്ങള് കടന്നുപോവുന്ന റോഡ് മുറിച്ചുകടക്കാന് ജനങ്ങള്ക്ക് ഏറെ പ്രയാസമാണ്. രാവിലെയും വൈകുന്നേരവും നിരവധി സ്കൂള് കുട്ടികള്ക്കും യാത്രക്കാര്ക്കും വളരെ ബുദ്ധിമുട്ടാണ് സൃഷ്ടിക്കുന്നത്. അപകടങ്ങള്ക്ക് കാരണവുമാവുന്നു.
ദിവസവും ആയിരക്കണക്കിന് വിദ്യാര്ത്ഥികളാണ് കുന്ദമംഗലത്തും സമീപ പ്രദേശങ്ങളിലുമായി പഠിക്കുന്നത്. വൈകുന്നേരങ്ങളില് ഇവരെല്ലാംകൂടെ ടൗണിലെത്തുമ്പോള് റോഡ് മുറിച്ചുകടക്കുകയെന്നത് ഏറെ ബുദ്ധിമുട്ടായ കാര്യമാണ്. ദിവസവും വന് ഗതാഗതക്കുരുക്കും ഉള്ളത് ഈ പ്രായാസം ഇരട്ടിയാക്കുന്നു. ടൗണില് ബസ് സ്റ്റാന്റിന് മുന്നില് മറ്റും മാത്രമാണ് പോലീസുകാര് സഹായത്തിനുള്ളത്.
വിഷയം ഉടന് പരിഹരിക്കണമെന്ന് ആവശ്യപ്പെട്ട് കുന്ദമംഗലം ഗ്രാമപഞ്ചായത്ത് അംഗം എം ബാബുമോന് പോലീസിലും മറ്റ് അധികാരികള്ക്കും പരാതി നല്കിയിട്ടുണ്ട്.