കോഴിക്കോട്: പ്രവാസി മലയാളികൾ നേരിടുന്ന വിവിധ വിഷയങ്ങളും പരാതികളും സമയബന്ധിതമായി പരിഹരിക്കുമെന്ന് കേരള നിയമസഭാ പ്രവാസികാര്യ ക്ഷേമ സമിതി ചെയർമാൻ പാറക്കൽ അബ്ദുല്ല എം.എൽ.എ പറഞ്ഞു. കോഴിക്കോട് കളക്ടറേറ്റ് ദർബാർ ഹാളിൽ ചേർന്ന പ്രവാസികാര്യ ക്ഷേമ സമിതിയുടെ ജില്ലാതല അദാലത്തിൽ അധ്യക്ഷത വഹിച്ചു സംസാരിക്കുകയായിരുന്നു അദ്ദേഹം.
അദാലത്തിൽ പ്രവാസികൾ ഉന്നയിച്ച വിവിധ പ്രശ്നങ്ങളും പരാതികളും പരിശോധിച്ച ശേഷം ആവശ്യമായ പരിഹാര നിർദ്ദേശങ്ങൾ അടങ്ങിയ റിപ്പോർട്ട് സർക്കാറിലേക്ക് സമർപ്പിക്കുമെന്നും അദ്ദേഹം വ്യക്തമാക്കി.
പ്രവാസികൾ നേരിടുന്ന സർട്ടിഫിക്കറ്റ് സംബന്ധമായതും മറ്റ് സർവീസ് സംബന്ധമായതുമായ പരാതികളിൽ ജില്ലാതലത്തിൽ അടിയന്തര നടപടി സ്വീകരിക്കുമെന്ന് യോഗത്തിൽ പങ്കെടുത്ത ജില്ലാ കളക്ടർ മാധവികുട്ടി ഐ.എ.എസ് ഉറപ്പുനൽകി. വില്ലേജ്, പഞ്ചായത്ത്, താലൂക്ക് ഓഫീസുകൾ മുഖേന ലഭിക്കേണ്ട ഔദ്യോഗിക രേഖകൾ അനാവശ്യ കാലതാമസം കൂടാതെ ലഭ്യമാക്കാൻ ബന്ധപ്പെട്ട ഉദ്യോഗസ്ഥർക്ക് കർശന നിർദ്ദേശം നൽകുമെന്നും കളക്ടർ അറിയിച്ചു.
തദ്ദേശ സ്വയംഭരണ സ്ഥാപനങ്ങളിൽ എല്ലാ വാർഡുകളിലും ഗ്രാമസഭ മാതൃകയിൽ ‘പ്രവാസി സഭ’കൾ ചേരണമെന്നും, പഞ്ചായത്തുകളിൽ പ്രവാസികാര്യങ്ങൾക്കായി പ്രത്യേക സ്റ്റാൻഡിങ് കമ്മിറ്റികൾ രൂപീകരിക്കണമെന്നും അദാലത്തിൽ നിർദ്ദേശമുയർന്നു.
സമിതി അംഗങ്ങളായ എം.എൽ.എമാരായ കെ.എം അഭിജിത്, പഴകുളം മധു, മുഹമ്മദ് മുഹ്സിൻ, എം. വിൻസെന്റ്, സേവ്യർ ചിറ്റിലപ്പള്ളി, എന്നിവരും തദ്ദേശം, നോർക്ക-പ്രവാസികാര്യ വകുപ്പുകളിലെ മുതിർന്ന ഉദ്യോഗസ്ഥർ, വിവിധ പ്രവാസി സംഘടനാ പ്രതിനിധികൾ, പൊതുജനങ്ങൾ തുടങ്ങിയവർ യോഗത്തിൽ പങ്കെടുത്തു. പ്രവാസി ക്ഷേമനിധി, നോർക്ക പ്ലസ് ഇൻഷൂറൻസ് ഉൾപ്പെടെയുള്ള വിഷയങ്ങളിൽ പ്രവാസി സംഘടനകളുടെയും വ്യക്തികളുടെയും നിരവധി പരാതികളും നിവേദനങ്ങളും യോഗത്തിൽ സ്വീകരിച്ചു.
