കോഴിക്കോട്: ജില്ലയിൽ നടത്തിയ രണ്ട് വ്യത്യസ്ത രാസലഹരി വേട്ടകളിൽ ആകെ 20.5 ഗ്രാം എംഡിഎംഎയുമായി മൂന്ന് പേരെ ഡാൻസാഫ് സംഘവും വിവിധ പോലീസ് സ്റ്റേഷനുകളിലെ ഉദ്യോഗസ്ഥരും ചേർന്ന് പിടികൂടി.
ആദ്യ സംഭവത്തിൽ, കോഴിക്കോട് പുതിയ ബസ് സ്റ്റാൻഡിന് സമീപം ഇന്ന് രാവിലെ നടത്തിയ പരിശോധനയിൽ 19 ഗ്രാം എംഡിഎംഎയുമായി കൊളത്തറ റഹ്മാൻ ബസാർ സ്വദേശികളായ ഷിബിലി റഹ്മാനും,സുഹൈലും ഡാൻസാഫ് സംഘവും കസബ പോലീസും ചേർന്ന് പിടികൂടി.
പിടിയിലായ ഷിബിലി റഹ്മാൻ മുൻപ് ലഹരി കേസിൽ അറസ്റ്റിലായിട്ടുള്ളയാളാണെന്ന് പോലീസ് അറിയിച്ചു. നേരത്തെയും ഡാൻസാഫിന്റെ പരിശോധനയിൽ നിന്ന് തലനാരിഴയ്ക്ക് രക്ഷപ്പെട്ടിരുന്നയാളാണെന്നും അധികൃതർ വ്യക്തമാക്കി.
മറ്റൊരു സംഭവത്തിൽ, വാഹന പരിശോധനയ്ക്കിടെ 1.5 ഗ്രാം എംഡിഎംഎയുമായി മലപ്പുറം പള്ളിക്കൽ ബസാർ സ്വദേശി മുഹമ്മദ് വാഹിദിനെ ഡാൻസാഫ് സംഘവും എലത്തൂർ പോലീസും ചേർന്ന് പിടികൂടി. ലഹരി വിൽപ്പന നടത്തുന്നതിനിടെയാണ് ഇയാൾ അറസ്റ്റിലായതെന്ന് പോലീസ് അറിയിച്ചു. ഇയാളും മുൻപ് ലഹരി കേസിൽ പ്രതിയായിരുന്നുവെന്നാണ് വിവരം.സംഭവങ്ങളിൽ ബന്ധപ്പെട്ട് കൂടുതൽ അന്വേഷണം പുരോഗമിക്കുകയാണെന്ന് പോലീസ് അറിയിച്ചു
