കോഴിക്കോട്: ആലപ്പുഴ-കണ്ണൂർ എക്സിക്യൂട്ടീവ് എക്സ്പ്രസിൽ പെട്രോൾ ഒഴിച്ച് തീയിട്ടസംഭവത്തിൽ പ്രതിയെന്ന് സംശയിക്കുന്നയാളുടെ വിവരങ്ങൾ തേടി അന്വേഷണ ഉദ്യോഗസ്ഥർ ഉത്തർപ്രദേശിലെ നോയിഡയിൽ എത്തി. അന്വേഷണ സംഘത്തിന്റെ ഭാഗമായ കോഴിക്കോട് റെയിൽവേ പോലീസിലെ രണ്ട് ഉദ്യോഗസ്ഥരാണ് ഇന്നലെ വൈകുന്നേരം വിമാനമാർഗം യുപിയിലേക്ക് പോയത്. പ്രതിയെന്ന് സംശയിക്കുന്ന ഷാറൂഖ് സെയ്ഫിന്റെ സാമൂഹിക പശ്ചാത്തലം ഉൾപ്പെടെയുള്ള വിവരങ്ങൾ ശേഖരിക്കാനാണ് ഇവർക്കു നൽകിയിരിക്കുന്ന നിർദേശം. ആവശ്യമെങ്കിൽ നോയിഡയ്ക്ക് പുറത്തേക്കും അന്വേഷണം നടത്താനും ചുമതലപ്പെടുത്തിയിട്ടുണ്ട്.
ആക്രമണം നടന്ന എലത്തൂർ റെയിൽവേ സ്റ്റേഷനു സമീപത്തെ ട്രാക്കിൽ നിന്നു കണ്ടെത്തിയ ബാഗിൽ നിന്നു ലഭിച്ച വിവരങ്ങളുടെ അടിസ്ഥാനത്തിലാണ് ഉത്തരേന്ത്യക്കാരനാണ് പ്രതിയെന്ന നിഗമനത്തിലേക്ക് പോലീസ് എത്തിയത്. എന്നാൽ പ്രതി ഇയാളെന്ന കാര്യം പോലീസ് ഔദ്യാഗികമായി സ്ഥിരീകരിച്ചിട്ടില്ല. പ്രതി കസ്റ്റഡിയിലായെന്ന വാർത്തകൾ പുറത്തുവരുന്നുണ്ടെങ്കിലും ഇക്കാര്യവും പോലീസ് സ്ഥിരീകരിച്ചിട്ടില്ല. സിം ഊരിമാറ്റിയ നിലയിലുള്ള മൊബൈൽഫോൺ, പെട്രോൾ അടങ്ങിയ കുപ്പി, നോട്ട് പാഡ്, നോട്ട്ബുക്ക്, ഫോൺകവർ, ഹെഡ്സെറ്റ്, മൊബൈൽചാർജർ തുടങ്ങിയ വസ്തുക്കളാണ് ട്രാക്കിൽ നിന്നു കിട്ടിയ ബാഗിൽ ഉണ്ടായിരുന്നത്.
പഴ്സ്, മരുന്നുഡപ്പി, ചപ്പാത്തിയും കറിയുമടങ്ങിയ ടിഫിൻ ബോക്സ്, ടീഷർട്ട്, ട്രാക്ക് പാന്റ്സ്, ഓവർകോട്ട് എന്നിവയും ബാഗിൽ ഉണ്ടായിരുന്നു. മൊബൈൽഫോണിന്റെ ഐഎംഇഐ പരിശോധനയിൽ ഇത് ഏറ്റവുമൊടുവിൽ ഉപയോഗിച്ചത് മാർച്ച് 31ന് ആണെന്നു കണ്ടെത്തിയിട്ടുണ്ട്. കണ്ടെടുത്ത നോട്ട്ബുക്കിലെ ഒരു പേജിൽ പലതവണ ഷാറൂഖ് സെയ്ഫി കാർപെന്റർ എന്ന് എഴുതിയിട്ടുണ്ട്. തൊട്ടടുത്ത പേജിൽ ഇതിന്റെ ആദ്യാക്ഷരങ്ങൾ ചേർത്ത് എസ്എസ് സി എന്ന ലോഗോ വരച്ചുണ്ടാക്കിയിട്ടുമുണ്ട്. നോയിഡയിലെയും ഇന്ദിരമാർക്കറ്റിലെയും ചില കണക്കുകളും ബുക്കിലുണ്ടായിരുന്നു.
ഫക്രുദീൻ കാർപെന്റർ എന്ന മറ്റൊരു പേരും കാഫിർ കാർപെന്റർ എന്നും എഴുതിയിട്ടുണ്ട്. ഇതെല്ലാം വിശദമായി പരിശോധിച്ച ശേഷമാണ് പ്രതിയെന്നു സംശയിക്കുന്നയാൾ ഷാറൂഖ് സെയ്ഫാണെന്ന നിഗമനത്തിലേക്ക് പോലീസ് എത്തിയത്. തുടർന്ന് ഇയാളുടെ രേഖാചിത്രം തയ്യാറാക്കി പുറത്തുവിട്ട് അന്വേഷണം ഊർജിതമാക്കി. പ്രതിയെന്നു സംശയിക്കുന്ന ഷാറൂഖ് സെയ്ഫിന്റെ ഫോട്ടോ പോലീസിനു ലഭിച്ചിട്ടുണ്ട്. ഇതു കേസിലെ സാക്ഷികൾ തിരിച്ചറിഞ്ഞതായി വിവരമുണ്ട്. ഇതിന്റെയെല്ലാം തുടർനടപടിയെന്ന നിലയിലാണ് നോയിഡയിൽ നിന്നുള്ള വിവരശേഖരണം.
