ശ്രീകാര്യത്തില് യുവാവിനെ റോഡരികില് മരിച്ച നിലയില് കണ്ടെത്തിയ സംഭവം കൊലപാതകം. ഇന്നലെ രാത്രി 7 മണിക്ക് ഒരു ബന്ധുവിനൊപ്പം മൊബൈൽ വാങ്ങാൻ പുറത്തുപോയ സാജു മടങ്ങി വന്നിരുന്നില്ല. പുലർച്ചെ നാലുമണിയോടെയാണ് കട്ടേല ട്രിനിറ്റി സ്കൂളിന് സമീപം സാജുവിന്റെ മൃതദേഹം കണ്ടെത്തിയത്. വെഞ്ഞാറമൂട്ടിലെ ഒരു കോഴിക്കടയിലെ ജീവനക്കാരനാണ് 38കാരനായ സാജു. ഇന്നലെ ഇയാള് സുഹൃത്തുക്കളായ അനീഷ്, വിനോദ് എന്നിവര്ക്കൊപ്പം മദ്യപിച്ചിരുന്നു. ഇതിനിടയില് സാജുവിന്റെ മൊബൈല് ഫോണ് സുഹൃത്തുക്കള് കൈവശപ്പെടുത്തി. ഈ മൊബൈല് വാങ്ങാനാണ് അമ്പാടിനഗറിലെ വീട്ടില് നിന്ന് സാജു ഇന്നലെ രാത്രി ഇറങ്ങിയത്. പിന്നീട് ഇയാള് മടങ്ങിയെത്തിയില്ല.
ഇന്ന് പുലര്ച്ചെ നാല് മണിയോടെ ട്രിനിറ്റി കോളജിന് സമീപം സാജു റോഡരികില് കിടക്കുന്നതാണ് കണ്ടത്. മദ്യപിച്ച് കിടക്കുകയാണെന്നാണ് ആദ്യം കരുതിയത്. പിന്നീടാണ് തലയ്ക്കും ശരീരത്തിലുമേറ്റ പരിക്കുകള് ശ്രദ്ധിച്ചത്. പൊലീസ് എത്തി മെഡിക്കല് കോളജ് ആശുപത്രിയില് എത്തിച്ചെങ്കിലും അപ്പോഴേക്കും മരിച്ചിരുന്നു. മദ്യപാനത്തിനിടെയുള്ള തർക്കമാകാം കൊലപാതക കാരണമെന്നും പോലീസ് പറഞ്ഞു. മൂവരും സ്ഥിരം ഒന്നിച്ചു മദ്യപിക്കുന്നവരെന്നും പൊലീസ് വ്യക്തമാക്കി.
