തൃശൂര് പിള്ളപ്പാറ മേഖലയില് കാട്ടുപന്നികള് ചത്തത് ആന്ത്രാക്സ് മൂലമെന്ന് പരിശോധനാ ഫലം. ആരോഗ്യ വകുപ്പ് പ്രതിരോധ നടപടികള് അടിയന്തരമായി സ്വീകരിച്ചു വരികയാണെന്ന് ആരോഗ്യ മന്ത്രി വീണാ ജോര്ജ്. അതിരപ്പള്ളി പഞ്ചായത്തിലെ മലയോര മേഖലയിലെ കാട്ടു പന്നികളിലാണ് ആന്ത്രാക്സ് രോഗബാധ സ്ഥിരീകരിച്ചത്.
അതിരപ്പള്ളി വന മേഖലയില് കാട്ടുപന്നികള് കൂട്ടത്തോടെ ചത്തതിനെ തുടര്ന്ന് ആരോഗ്യ വകുപ്പും മൃഗസംരക്ഷണ വകുപ്പും വനം വകുപ്പും അന്വേഷണം നടത്തിയിരുന്നു. ഇവയുടെ സാംപിളുകള് പരിശോധിച്ചതില് നിന്നും ബാസിലസ് ആന്ത്രാസിസ് മൂലമുള്ള രോഗബാധയാണെന്ന് സ്ഥിരീകരിച്ചു. സ്ഥലത്തെ ചത്ത പന്നികളുടെ മൃതശരീരം നീക്കം ചെയ്യാനായി പോയ ആളുകള് നിരീക്ഷണത്തിലാണ്.
കാട്ടുപന്നികള് ഉള്പ്പെടെയുള്ള മൃഗങ്ങള് കൂട്ടത്തോടെ ചാകുന്നത് ശ്രദ്ധയില്പ്പെട്ടാല് ആ സ്ഥലങ്ങളില് ആളുകള് പോകാതിരിക്കാനും അവയുടെ മൃതശരീരങ്ങള് കൈകാര്യം ചെയ്യാതിരിക്കാനും പ്രത്യേകം ശ്രദ്ധിക്കണം. അവര് മൃഗസംരക്ഷണ വകുപ്പിലേയോ ആരോഗ്യ വകുപ്പിലേയോ വനം വകുപ്പിലേയോ ഉദ്യോഗസ്ഥരെ വിവരം അറിയിക്കേണ്ടതാണെന്നും മന്ത്രി അഭ്യര്ത്ഥിച്ചു. തൃശൂര് ജില്ലയില് ഇതു സംബന്ധിച്ച് അവലോകന യോഗം ചേര്ന്ന് പ്രതിരോധ പ്രവര്ത്തനങ്ങള് ഊര്ജിതമാക്കിയിട്ടുണ്ട്. മൃഗങ്ങളില് വാക്സിനേഷന് ആരംഭിക്കാനുള്ള നടപടികള് മൃഗസംരക്ഷണ വകുപ്പ് സ്വീകരിച്ചിട്ടുണ്ട്.
ബാസിലസ് ആന്ത്രാസിസ് എന്ന ബാക്ടീരിയ മൂലമുണ്ടാകുന്ന ഒരു സാംക്രമിക രോഗമാണ് ആന്ത്രാക്സ്. മൃഗങ്ങളില് നിന്നും മനുഷ്യരിലേക്ക് പകരുന്ന രോഗമാണിത്. യഥാസമയം ശരിയായ ചികിത്സ നല്കിയില്ലെങ്കില് രോഗം വഷളാകാനും മരണം വരെ സംഭവിക്കാനും സാധ്യതയുണ്ട്.
