സൂപ്പര്സ്റ്റാര് രജനീകാന്തിന്റെ പുതിയ രാഷ്ട്രീയ പാര്ട്ടിയുടെ പേര് മക്കള് സേവൈ കക്ഷി എന്ന് തീരുമാനിച്ചു. അനൈതിന്ത്യ മക്കള് ശക്തി കഴകമെന്ന പാര്ട്ടിയുടെ നേരത്തെ നിശ്ചയിച്ചിരുന്ന പേരുമാറ്റി രജിസ്റ്റര് ചെയ്തു. പാര്ട്ടിയുടെ ചിഹ്നമായി ഓട്ടോറിക്ഷ തെരഞ്ഞെടുപ്പ് കമ്മീഷന് അംഗീകരിക്കുകയും ചെയ്തതോടെ ബാഷ സ്റ്റൈലില് രജനീകാന്ത് തമിഴ് രാഷ്ട്രീയത്തില് ഇറങ്ങുമെന്ന് ഏതാണ്ട് ഉറപ്പായി കഴിഞ്ഞു.
സംസ്ഥാനത്തെ 234 നിയമസഭാ സീറ്റുകളിലും മത്സരിക്കാനാണ് പുതിയ പാര്ട്ടി ഒരുങ്ങുന്നത്. പുതിയ രാഷ്ട്രീയ പാര്ട്ടി ജനുവരിയില് നിലവില് വരുമെന്ന് രജനീകാന്ത് ഡിസംബര് എട്ടിന് വ്യക്തമാക്കിയിരുന്നു. ‘വരാനിരിക്കുന്ന നിയമസഭാ തെരഞ്ഞെടുപ്പില്, ഞങ്ങള് തീര്ച്ചയായും വിജയിക്കുകയും ജാതിമത വ്യത്യാസമില്ലാതെ സത്യസന്ധവും സുതാര്യവും അഴിമതി രഹിതവും ആത്മീയവുമായ രാഷ്ട്രീയം പ്രദാനം ചെയ്യുകയും ചെയ്യും’ രജിനികാന്ത് വ്യക്തമാക്കി. ഡിസംബര് 31 ന് തീരുമാനം സംബന്ധിച്ച കൂടുതല് പ്രഖ്യാപനം ഉണ്ടാകുമെന്നാണ് പ്രതീക്ഷിക്കപ്പെടുന്നത്.
രജനീകാന്തിന്റെ രാഷ്ട്രീയ അരങ്ങേറ്റം തമിഴ്നാട്ടിലെ രാഷ്ട്രീയ സമവാക്യങ്ങളില് മാറ്റം വരുത്തുമെന്നും ഡിഎംകെ, എഐഡിഎംകെ, ബിജെപി തുടങ്ങിയവര് നേതൃത്വം നല്കുന്ന സഖ്യത്തെ പുനര്നിര്വചിക്കാമെന്നുമാണ് രാഷ്ട്രീയ നിരീക്ഷകര് കരുതുന്നത്. നടന്റെ രാഷ്ട്രീയ പ്രവേശനത്തെ വിമര്ശിക്കാന് ഡിഎംകെ ഇതിനകം തയാറായിട്ടുണ്ടെങ്കിലും അന്തരിച്ച മുഖ്യമന്ത്രി ജയലളിതയുടെ സഹായി ശശികലയുടെ മടങ്ങിവരവോടെ തമിഴ്നാട്ടിലെ രാഷ്ട്രീയക്കളിക്കളത്തില് വലിയ ട്വിസ്റ്റ് ഉണ്ടാകുമെന്നാണ് ഒരു വിഭാഗം കരുതുന്നത്.
