തിരുവനന്തപുരം: ജി.എൻ.എയുമായുള്ള വൈദ്യുതി കരാർ വേണ്ടെന്ന് വെക്കാനുള്ള തീരുമാനത്തിന് ശേഷവും സർക്കാരിലും കെ.എസ്.ഇ.ബിയിലും തർക്കങ്ങളും അതൃപ്തിയും തുടരുന്നു. ഹിമാചൽ പ്രദേശിൽ നിന്നുള്ള വൈദ്യുതി വാങ്ങൽ നീക്കത്തെ സംശയ നിഴലിലാക്കിയതിൽ വൈദ്യുതി മന്ത്രി സണ്ണി ജോസഫ് കടുത്ത അമർഷത്തിലാണ്. സ്വകാര്യ കമ്പനിയായ ജി.എൻ.എയിൽ നിന്നും വൈദ്യുതി വാങ്ങേണ്ടെന്ന തീരുമാനം ഉന്നത ഉദ്യോഗസ്ഥർ മുഖ്യമന്ത്രിയെ നേരിട്ട് അറിയിച്ച വിവരം മാധ്യമങ്ങളിലൂടെയാണ് മന്ത്രി അറിഞ്ഞത്. ഇതാണ് അദ്ദേഹത്തിന്റെ അതൃപ്തിക്ക് കാരണമായത്. അതേസമയം, കരാറിലെ അഴിമതി ശ്രമം പുറത്തായതോടെയാണ് സർക്കാർ പിന്മാറിയതെന്നാണ് പ്രതിപക്ഷത്തിന്റെ ആരോപണം.
ജി.എൻ.എയുമായുള്ള ഇടപാടിൽ നിന്നുള്ള പിന്മാറ്റം നിഷ്കളങ്കമല്ലെന്ന് ആരോപിക്കുന്ന പ്രതിപക്ഷം, ഈ നീക്കത്തിൽ അന്വേഷണം വേണമെന്നും ആവശ്യപ്പെടുന്നു. നിലവിൽ ജി.എൻ.എ കരാറിൽ നിന്ന് പിന്മാറാൻ നിർദ്ദേശിച്ചതിനൊപ്പം, സംസ്ഥാനത്ത് കടുത്ത വൈദ്യുതി പ്രതിസന്ധിയുണ്ടെന്ന് കാണിച്ച് മുൻ കെ.എസ്.ഇ.ബി ചെയർമാൻ സർക്കാരിന് നൽകിയ റിപ്പോർട്ടിനെക്കുറിച്ച് അന്വേഷിക്കാൻ മുഖ്യമന്ത്രി ഉത്തരവിട്ടിട്ടുണ്ട്. വരും മാസങ്ങളിൽ പീക്ക് ഡിമാൻഡിൽ വൻ വർദ്ധനവുണ്ടാകുമെന്നും വൈദ്യുതി വാങ്ങിയില്ലെങ്കിൽ പവർകട്ട് ഏർപ്പെടുത്തേണ്ടി വരുമെന്നുമായിരുന്നു മുൻ ചെയർമാൻ എം.ജി. രാജമാണിക്യത്തിന്റെ മുന്നറിയിപ്പ്.
സംസ്ഥാനത്ത് വരുന്ന ആറു മാസത്തേക്ക് നിലവിൽ വൈദ്യുതി പ്രതിസന്ധിയില്ലെന്നും ഹ്രസ്വകാല കരാറുകളുടെ ആവശ്യകതയില്ലെന്നുമാണ് പുതിയ കെ.എസ്.ഇ.ബി ചെയർമാന്റെ വിലയിരുത്തൽ. എങ്കിലും വരും വേനൽക്കാലത്തെ നേരിടാനായി മറ്റ് സ്രോതസ്സുകളിൽ നിന്ന് വൈദ്യുതി ഉറപ്പാക്കാനുള്ള ശ്രമങ്ങൾ ബോർഡ് ആരംഭിച്ചിട്ടുണ്ട്. സിന്നാർ താപ നിലയത്തിൽ നിന്ന് മാർച്ചോടെ 540 മെഗാവാട്ട് വൈദ്യുതി ലഭിക്കുന്നതിനുള്ള കരാർ ഉറപ്പിക്കാനുള്ള നീക്കങ്ങൾ പുരോഗമിക്കുകയാണ്. ഇതുകൂടാതെ കേന്ദ്ര വിഹിതമായി ലഭിക്കുന്ന അധിക വൈദ്യുതി ഡിസംബർ വരെ നീട്ടി ലഭിച്ചത് കെ.എസ്.ഇ.ബിക്ക് വലിയ ആശ്വാസമായിട്ടുണ്ട്.
