തിരുവനന്തപുരം: അർജന്റീന ഫുട്ബോൾ ടീമിനെ പരിഹസിച്ചുകൊണ്ട് കേരള പോലീസ് സോഷ്യൽ മീഡിയയിൽ പങ്കുവെച്ച പോസ്റ്റിനെതിരെ പരാതി. മലപ്പുറം സ്വദേശിയായ യുവാവ് മുഖ്യമന്ത്രി, ആഭ്യന്തരമന്ത്രി, ഡിജിപി എന്നിവർക്ക് നൽകിയ പരാതിയിലാണ് നടപടി ആവശ്യപ്പെട്ടിരിക്കുന്നത്. ലോകത്തെ മുൻനിര ടീമുകളിലൊന്നായ അർജന്റീനയെ ഔദ്യോഗിക പ്ലാറ്റ്ഫോം ഉപയോഗിച്ച് മോശമായി ചിത്രീകരിച്ചു എന്നും, ഉദ്യോഗസ്ഥൻ സ്വന്തം താല്പര്യങ്ങൾക്കായി ഔദ്യോഗിക സംവിധാനത്തെ ദുരുപയോഗം ചെയ്തു എന്നും പരാതിയിൽ ചൂണ്ടിക്കാട്ടുന്നു.
കേരളത്തിലെ ജനങ്ങൾക്കൊപ്പം പോലീസ് ഉണ്ടെന്ന സന്ദേശം നൽകാൻ പങ്കുവെച്ച പോസ്റ്ററായിരുന്നു വിവാദമായത്. ലയണൽ മെസ്സിയുടെ തോളിൽ കൈവെച്ചുനിൽക്കുന്ന റഫറിയുടെ ചിത്രത്തിന് സമാനമായി, കേരളത്തെ ചേർത്തുവെച്ചുനിൽക്കുന്ന പോലീസുകാരന്റെ ചിത്രമാണ് പോസ്റ്ററിൽ ഉണ്ടായിരുന്നത്. “ഒപ്പമുണ്ട്” എന്ന തലക്കെട്ടോടെ നൽകിയ ഈ പോസ്റ്റ്, ഫിഫയും റഫറിമാരും മെസ്സിയെ സഹായിക്കുന്നു എന്ന ആരോപണങ്ങൾ സജീവമായിരുന്ന സമയത്തായിരുന്നു പങ്കുവെച്ചത്.
ഈജിപ്തിനെതിരായ അർജന്റീനയുടെ മത്സരത്തിൽ റഫറി പക്ഷപാതം കാണിച്ചെന്ന ആരോപണങ്ങൾക്കിടെ വന്ന ഈ പോസ്റ്റ് വലിയ പ്രതിഷേധങ്ങൾക്ക് വഴിവെച്ചിരുന്നു. വ്യാപകമായ വിമർശനങ്ങൾ ഉയർന്നതോടെ കേരള പോലീസ് ഈ പോസ്റ്റ് സോഷ്യൽ മീഡിയ പേജിൽ നിന്നും പിൻവലിച്ചു. എന്നിരുന്നാലും, വിഷയത്തിൽ ഉത്തരവാദികളായ ഉദ്യോഗസ്ഥർക്കെതിരെ കർശന നടപടി വേണമെന്നാവശ്യപ്പെട്ടാണ് യുവാവ് പരാതി നൽകിയിരിക്കുന്നത്.
