രാജ്യത്ത് ആദ്യമായി കൊവിഡ് രോഗികളേക്കാള് കൂടുതല് പേര് രോഗമുക്തി നേടിയതായി ആരോഗ്യമന്ത്രാലയത്തിന്റെ കണക്കുകള്. 2,76,583 കേസുകള് റിപ്പോര്ട്ട് ചെയ്തതില് നിലവില് രോഗികളായി തുടരുന്നവര് 1,33,632 എണ്ണമാണ്. എന്നാല് 1,35,206 പേര് രോഗമുക്തരായി എന്നാണ് വിവരം. ഇന്ത്യയില് രോഗമുക്തരുടെ എണ്ണം രോഗികളേക്കാള് കൂടുതലാകുന്നത് ഇതാദ്യമായാണ്. 7754പേരാണ് ഇതുവരെ ഇന്ത്യയില് മരണമടഞ്ഞത്.
ലോകത്ത് ഏറ്റവും വേഗത്തില് കൊവിഡ് പടരുന്ന മൂന്നാമത്തെ രാജ്യമാണ് ഇന്ത്യ. അമേരിക്കയ്ക്കും ബ്രസീലിനും ശേഷം ഏറ്റവുമധികം പുതിയ രോഗികള് ഉണ്ടാകുന്നത് ഇന്ത്യയിലാണ്. ഏറ്റവും കൂടുതല് രോഗബാധിതരുള്ള രാജ്യങ്ങളുടെ പട്ടികയില് ഇന്ത്യ ആറാമതാണ്.
