തിരുവനന്തപുരം: സംസ്ഥാനത്തെ ലേണേഴ്സ് ലൈസൻസ് പരീക്ഷാ നടത്തിപ്പ് അവതാളത്തിൽ. കഴിഞ്ഞ രണ്ടുദിവസമായി സംസ്ഥാനത്തുടനീളം ലേണേഴ്സ് പരീക്ഷകൾ മുടങ്ങിക്കിടക്കുകയാണ്. പരീക്ഷ എഴുതാൻ സാധിക്കാത്തതിനെ തുടർന്ന് നൂറുകണക്കിന് ഉദ്യോഗാർത്ഥികളാണ് ഇപ്പോൾ ആശങ്കയിലായിരിക്കുന്നത്. ‘സാരഥി’ വെബ്സൈറ്റ് മുഖേന ഓൺലൈനായാണ് നിലവിൽ ലേണേഴ്സ് പരീക്ഷകൾ നടത്തുന്നത്.
ഈ വെബ്സൈറ്റിലുണ്ടായ പെട്ടെന്നുള്ള സാങ്കേതിക തകരാറാണ് പരീക്ഷകൾ പൂർണ്ണമായി മുടങ്ങാൻ കാരണമായത്. പരീക്ഷയ്ക്കായി ലോഗിൻ ചെയ്യാൻ ശ്രമിക്കുമ്പോൾ വെബ്സൈറ്റ് ഹോംപേജ് ഓപ്പൺ ആകുന്നുണ്ടെങ്കിലും, തൊട്ടടുത്ത ഘട്ടത്തിൽ ‘എറർ’ എന്ന് കാണിച്ച് സൈറ്റ് പൂർണ്ണമായി ബ്ലോക്ക് ആവുകയാണെന്ന് ഉദ്യോഗാർത്ഥികൾ പരാതിപ്പെടുന്നു. വെബ്സൈറ്റിലെ കനത്ത നെറ്റ്വർക്ക് തകരാറാണ് നിലവിലെ പ്രതിസന്ധിക്ക് കാരണം. സാങ്കേതിക പ്രശ്നങ്ങൾ അടിയന്തരമായി പരിഹരിക്കാനുള്ള ശ്രമങ്ങൾ നടക്കുകയാണെന്നും മോട്ടോർ വാഹനവകുപ്പ് അധികൃതർ വ്യക്തമാക്കി.
