തിരുവനന്തപുരം: സംസ്ഥാനത്ത് സെന്സസ് ഡ്യൂട്ടിയുടെ ഭാഗമായി അധ്യാപകരുടെ ഓണ്ലൈന് സ്ഥലംമാറ്റ നടപടികള് സര്ക്കാര് മരവിപ്പിച്ചിരിക്കെ, ഇത് പൂര്ണമായും മറികടന്ന് ആറ് പ്രധാനാധ്യാപകര്ക്ക് സ്ഥലംമാറ്റം നല്കിക്കൊണ്ട് പൊതുവിദ്യാഭ്യാസ വകുപ്പ് പുതിയ ഉത്തരവിറക്കി. ഓണ്ലൈന് വഴിയുള്ള സാധാരണ നടപടിക്രമങ്ങള് അട്ടിമറിച്ചാണ് ഈ നിയമനം നല്കിയിരിക്കുന്നത്. സ്ഥലംമാറ്റത്തിനായി കാത്തിരിക്കുന്ന മറ്റ് ഒട്ടേറെ അധ്യാപകര്ക്ക് അവസരം നിഷേധിക്കപ്പെട്ട സാഹചര്യത്തില്, ചിലര്ക്ക് മാത്രമായി നല്കിയ ഈ പ്രത്യേക നിയമനം വലിയ വിവാദങ്ങള്ക്ക് വഴിവെച്ചിരിക്കുകയാണ്.
പൊതുവിദ്യാഭ്യാസ ഡയറക്ടര് സ്നേഹില് കുമാര് സിങ് ഐഎഎസ് ആണ് 2026 ജൂണ് 11ന് ഈ വിവാദ ഉത്തരവ് പുറത്തിറക്കിയിരിക്കുന്നത്. ഭരണപരമായ സൗകര്യാര്ത്ഥമാണ് പൊതുവിദ്യാഭ്യാസ വകുപ്പിലെ എച്ച്എം/എഇഒ എന്നീ തത്തുല്യ തസ്തികയിലുള്ള ഈ ഉദ്യോഗസ്ഥരെ സ്ഥലംമാറ്റുന്നത് എന്നാണ് ഉത്തരവില് പ്രധാന കാരണമായി ചൂണ്ടിക്കാട്ടുന്നത്. നിലവില് ലഭ്യമായ ഒഴിവുകളിലേക്കാണ് ഇവര്ക്കെല്ലാം പുതിയതായി നിയമനം നല്കിയിരിക്കുന്നത്.
