കോട്ടയം: കോട്ടയം മെഡിക്കല് കോളേജില് കെട്ടിടം തകര്ന്നുണ്ടായ അപകടത്തില് മരിച്ച ബിന്ദുവിന്റെ മൃതദേഹം വീട്ടിലെത്തിച്ചു. തലയോലപ്പറമ്പിലെ വീട്ടില് അല്പ്പസമയം മുമ്പാണ് മൃതദേഹം എത്തിച്ചത്. വികാരനിര്ഭരമായ രംഗങ്ങളാണ് വീട്ടില് അരങ്ങേറിയത്. മക്കളും ഭര്ത്താവും ഉറ്റവരും ബിന്ദുവിനെ അവസാനമായി കണ്ടു. ബിന്ദുവിന് അന്ത്യാഞ്ജലി അര്പ്പിക്കാന് നാട്ടുകാരും വീട്ടില് തടിച്ചുകൂടി. രാവിലെ 11മണിയോടെയാണ് സംസ്കാരം നടക്കുക. മകളുടെ ശസ്ത്രക്രിയയുമായി ബന്ധപ്പെട്ടാണ് ബിന്ദു കോട്ടയം മെഡിക്കല് കോളേജിലെത്തിയത്. ശസ്ത്രക്രിയ കഴിഞ്ഞ് മടങ്ങാനിരിക്കെയാണ് അപകടം ഉണ്ടായത്.
അതേസമയം, കോട്ടയം മെഡിക്കല് കോളേജിലെ അപകടത്തില് മന്ത്രി വീണ ജോര്ജിനെതിരേയും മെഡിക്കല് കോളേജ് അധികൃതര്ക്കെതിരേയും വിമര്ശനവും പ്രതിഷേധവും ശക്തമാവുകയാണ്.
