കൊച്ചി : കപ്പല് മുങ്ങി കേരള തീരത്ത് അടിഞ്ഞ കണ്ടെയ്നറുകള് കസ്റ്റംസ് പിടിച്ചെടുക്കും. കണ്ടെയ്നറിലെ സാധനങ്ങള് ഇന്ത്യയിലേക്ക് ഇറക്കുമതി ചെയ്തതായി കണക്കാക്കി ഇറക്കുമതി ചുങ്കം ചുമത്തും. കപ്പലിന്റെ ഉടമ കമ്പനി ചുങ്കം അടച്ച് സാധനം ഏറ്റെടുക്കണം. അല്ലെങ്കില് കണ്ടുകെട്ടും.
1962 ലെ കസ്റ്റംസ് ആക്ട് സെക്ഷന് 21 അനുസരിച്ചാണ് നടപടി. കടലില് ഒഴുകി കരയ്ക്ക് അടുക്കുന്ന വസ്തുക്കള് ഇന്ത്യയിലേക്ക് ഇറക്കുമതി ചെയ്തതായി കണക്കാക്കി നികുതി ചുമത്തണം എന്നാണ് നിയമത്തിലെ ഈ വകുപ്പ് പറയുന്നത്.
ഇന്നലെ രാത്രി ചേര്ന്ന കസ്റ്റംസ് ഉന്നത ഉദ്യോഗസ്ഥരുടെ യോഗത്തിലാണ് തീരുമാനം. കണ്ടെയ്നര് അടിഞ്ഞ സ്ഥലങ്ങളില് കസ്റ്റംസ് ഉദ്യോഗസ്ഥര് എത്തി മഹസര് തയാറാക്കി ഏറ്റെടുക്കും. തീരത്ത് കസ്റ്റംസ് മറൈന് പട്രോള് ബോട്ടുകള് നിരീക്ഷണം ശക്തമാക്കും. ശക്തികുളങ്ങരയില് തീരത്ത് അടിഞ്ഞ കണ്ടയ്നറുകള് ബോട്ടുകള് ഉപയോഗിച്ച് കെട്ടിവലിച്ച് കൊല്ലം പോര്ട്ടിലേക്ക് മാറ്റും.
