തിരുവനന്തപുരം: രണ്ടാം പിണറായി സര്ക്കാര് അഞ്ചാം വര്ഷത്തിലേക്ക് കടക്കുമ്പോള് തെരഞ്ഞെടുപ്പുകളുടെ ആരവങ്ങള് ഉയരുകയാണ്. തുടര്ഭരണത്തിന് തുടര്ച്ചയാണ് ഇടതു മുന്നണി ലക്ഷ്യം. പത്തു വര്ഷം കൈവിട്ടു പോയ ഭരണം തിരിച്ചു പിടിക്കാന് പ്രതിപക്ഷവും ഒരുങ്ങുന്നു. പതിവു കളികള് മാറ്റി മറിക്കാന് ബിജെപിയും കരുക്കള് നീക്കിയതോടെ കേരള രാഷ്ട്രീയം കാല് വയ്ക്കുന്നത് ആവേശകരമായ ഒരു വര്ഷത്തിലേയ്ക്കാണ്.
തുടര്ച്ചയായി മൂന്നാമതും ഇടതു സര്ക്കാര് എന്നതാണ് സിപിഎം സമ്മേളനങ്ങളിലും നടന്ന പ്രധാന ചര്ച്ച. നവകേരളത്തിനായി പാര്ട്ടി പുതുവഴികള് വെട്ടുന്നതും തുടര്ഭരണം ലക്ഷ്യമിട്ടാണ്.
എന്നാലും തൊഴിലാളികളെ മറന്ന് സ്വകാര്യ മൂലധനത്തില് കണ്ണുവച്ചാല് എന്താകുമെന്ന ആശങ്കയോട് ഒറ്റയടിക്ക് കടക്ക് പുറത്തെന്ന് പറയാനും എല്ഡിഎഫ് സര്ക്കാര് തയ്യാറല്ല. ഒന്നാം പിണറായി സര്ക്കാരില് എന്നപോലെ രണ്ടാം സര്ക്കാരിലെ മന്ത്രിമാര് അത്ര പോരെന്ന വിമര്ശനമുണ്ട്. എന്നാല് പാര്ട്ടിയുടെ നോട്ടത്തില് മുഖ്യമന്ത്രിയുടെ റേറ്റിങ് ഉയര്ന്നു തന്നെയാണ് നില്ക്കുന്നത്. ഒരു പരിധിയും വയ്ക്കാതെ അടുത്ത തെരഞ്ഞെടുപ്പിന്റെയും നായകനായി പിണറായിയെ നിയോഗിക്കുന്നതും ഈ വിശ്വാസത്തിലാണ്.
