കൊല്ലം: കൊല്ലം താന്നിയില് രണ്ടര വയസ്സുള്ള കുഞ്ഞിനെ കൊലപ്പെടുത്തി ജീവനൊടുക്കിയ കുടുംബത്തിന് സാമ്പത്തിക ബാധ്യതയെന്ന് കൊല്ലം സിറ്റി പൊലീസ് കമ്മീഷണര്. മരിച്ച അജീഷിന് കഴിഞ്ഞ ദിവസം കാന്സര് സ്ഥിരീകരിച്ചിരുന്നു. അതിന്റെ സമ്മര്ദ്ദം കുടുംബത്തിനുണ്ടായിരുന്നുവെന്നും കമ്മീഷണര് കിരണ് നാരായണന് പ്രതികരിച്ചു. സംഭവസ്ഥലം സന്ദര്ശിച്ചശേഷം മാധ്യമങ്ങളോട് പ്രതികരിക്കുകയായിരുന്നു കമ്മീഷണര്.
താന്നിയില് ബിഎസ്എന്എല് ഓഫീസിന് സമീപം വാടകവീട്ടില് താമസിക്കുന്ന അജീഷ്, ഭാര്യ സുലു, രണ്ടര വയസ്സുള്ള കുഞ്ഞ് എന്നിവരെയായിരുന്നു മരിച്ച നിലയില് വീട്ടിനുള്ളില് കണ്ടെത്തിയത്. ഇവരെ കൂടാതെ അജീഷിന്റെ അമ്മയും അച്ഛനും വീട്ടിലുണ്ടായിരുന്നു. രാവിലെ വൈകിയിട്ടും ഇരുവരും എഴുന്നേല്ക്കാതെ വന്നതോടെ അച്ഛനും അമ്മയും അയല്വാസികളെ വിളിക്കുകയും വാതില് തട്ടിക്കുറക്കുകയുമായിരുന്നു.
കുഞ്ഞിനെ കൊലപ്പെടുത്തിയ ശേഷം ഇരുവരും തൂങ്ങി മരിക്കുകയായിരുന്നുവെന്നാണ് പ്രാഥമിക വിവരം. കുഞ്ഞിനെ കഴുത്തറുത്ത് കൊലപ്പെടുത്തി കട്ടിലില് കിടക്കുന്ന നിലയിലായിരുന്നു കണ്ടെത്തിയത്. മാതാപിതാക്കളെ അതേ മുറിക്ക് സമീപം തൂങ്ങി മരിച്ച നിലയിലും കണ്ടെത്തി. ഇരവിപുരം പൊലീസ് സ്ഥലത്തെത്തി പരിശോധന ആരംഭിച്ചു.
