തിരുവനന്തപുരം : സ്റ്റേറ്റ് ഫാമിംഗ് കോര്പ്പറേഷന് എംഡി എല്. ഷിബു കുമാറിനെ സര്ക്കാര് പുറത്താക്കി. ഹൈക്കോടതി നിര്ദ്ദേശ പ്രകാരമാണ് നിയമനം പുന പരിശോധിച്ചുള്ള തീരുമാനം. യുഡിഎഫ് ഭരണകാലത്ത് കെപി മോഹനന് കൃഷി മന്ത്രിയായിരുന്നപ്പോഴായിരുന്നു ചട്ടങ്ങള് മറികടന്ന് ഷിബു കുമാറിന്റെ നിയമനം. നിയമവകുപ്പ് എതിര്ത്തിട്ടും മന്ത്രിസഭാ യോഗത്തില് വച്ച് സ്ഥിരം എംഡിയായി നിയമനം നല്കുകയായിരുന്നു. കോര്പ്പറേഷനിന് കീഴിലെ ഒരു സൊസൈറ്റിലെ ഓഫീസ് അസിസ്റ്റഡ് തസ്തികയിലുള്ളയാളെയാണ് എംഡിയായി നിയമിച്ചത്.
ഒന്നാം പിണറായി സര്ക്കാരിന്റെ കാലത്ത് പരാതി വന്നുവെങ്കിലും നിയമനം പുന: പരിശോധിച്ചില്ല. ഹൈക്കോടതി നിര്ദ്ദേശ പ്രകാരം മന്ത്രി പി. പ്രസാദാണ് നിയമനം പുന: പരിശോധിക്കാന് മന്ത്രിസഭയില് ആവശ്യപ്പെട്ടത്. മന്ത്രിസഭാ തീരുമാന പ്രകാരം പുറത്താക്കി കൃഷിവകുപ്പ് പ്രിന്സിപ്പല് സെക്രട്ടറി ഉത്തരവിറക്കി.
